ევროკავშირში კორონავირუსის მასობრივი ვაქცინაციის დაწყებასთან დაკავშირებით, ევროპოლი სახელმწიფო მეთაურებს ბაზარზე ყალბი ვაქცინების გამოჩენის შესახებ აფრთხილებს. ამის შესახებ გერმანული მედია იუწყება.
ევროპოლის ხელმძღვანელის კეტრინ დე ბოლის განცხადებით, არსებობს რეალური საფრთხე იმისა, რომ მსოფლიო ბაზარზე ვაქცინაზე დიდი მოთხოვნილების გამო, კორონავირუსის პანდემიას კრიმინალები თავის სასარგებლოდ გამოიყენებენ და მოგების მიღებას შეეცდებიან.
დე ბოლის თქმით, სოციალურ ქსელებში უკვე გამოჩნდა თაღლითების მიერ გამოქვეყნებული ყალბი ვაქცინის რეკლამები. ევროპოლის ხელმძღვანელი მოსახლეობას აფრთხილებს, რომ მსგავსი განცხადებების მეშვეობით მედიკამენტები არ შეიძინონ. ვინაიდან, თანხის გადახდის შემდეგ თაღლითები მიიმალებიან, ან ჯანმრთელობისათვის საზიანო პრეპარატს გაასაღებენ.
ამასთან, ევროპოლის ხელმძღვანელმა აღნიშნა ისიც, რომ სამართალდამცავი ორგანოები კორონავირუსის ვაქცინის მოპარვის მცდელობებისთვის მზად უნდა იყვნენ.
"პირველი ლოქდაუნის დროს, ბანდებმა თავს დაესხნენ, სამედიცინო პირბადეებით დატვირთულ მანქანებს. ეს საშიშროება ვაქცინებთან მიმართებაშიც არსებობს", - განაცხადა დე ბოლმა.
