გაერო-ს გენერალური მდივანი, ანტონიო გუტიერეში მოუწოდებს, ღარიბი ქვეყნებისათვის ვალების გაყინვის პროცესი 2022 წლამდე გაგრძელდეს. ამის შესახებ მან განვითარების დაფინანსებისადმი მიძღვნილ ფორუმზე სიტყვით გამოსვლისას განაცხადა.
გუტიერეში ასევე ვაქცინის განაწილების მექანიზმის, COVAX-ის დაფინანსების ხარვეზის აღმოფხვრისკენ მოუწოდებს.
მისი თქმით, აუცილებელია ვალის კრიზისის პრობლემის გადაჭრა სესხის გადახდების შეჩერების გზით, ასევე იმ ქვეყნებისთვის ვალების ჩამოწერით, ვისაც ეს ახლა ყველაზე მეტად სჭირდება.
”მე მივესალმები G20- ს მხარდაჭერას, რომ სესხის მომსახურების შეჩერების ინიციატივა ამ წლის ბოლომდე გაგრძელდეს, მაგრამ მე მოვუწოდებ, რომ ის 2022 წელსაც გაგრძელდეს”, - განაცხადა გაერო-ს გენერალურმა მდივანმა.
გუტიერეშის თქმით, ბოლო ერთი წლის განმავლობაში მსოფლიოში უმდიდრესი ადამიანების ქონება 5 ტრილიონი დოლარით გაიზარდა. მან მთავრობებს მოუწოდა, უკიდურესი უთანასწორობის შესამცირებლად, განიხილონ გადასახადის დაწესება მათთვის, ვინც პანდემიის დროს მოგებას იღებდა.
