ისრაელი კომპანია Pfizer-ისგან COVID-19-ის საწინააღმდეგო ექსპერიმენტული აბების შეძენას გეგმავს. ამის შესახებ ისრაელის პრემიერ-მინისტრმა, ნაფტალი ბენეტმა განაცხადა. ინფორმაციას Times of Israel ავრცელებს.
”ჩვენ წინ კარგი სიახლეები გველის კოროვირუსის საწინააღმდეგო მედიკამენტების შესახებ”, - განაცხადა ბენეტმა ყოველკვირეული მთავრობის სხდომის დაწყებისას.
პრემიერ-მინისტრმა დასძინა, რომ მან სთხოვა ჯანდაცვის წარმომადგენლებს, Pfizer-ის COVID-19-ის საწინააღმდეგო მედიკამენტების შესყიდვა „სიღრმისეულად შეესწავლათ“.
"თუ პრეპარატი დამტკიცდება, ის ვაქცინასთან და ყველასთვის ხელმისაწვდომი ტესტებთან ერთად, პანდემიის კონტროლის კიდევ ერთი მნიშვნელოვანი საშუალება გახდება“, – აღნიშნა მთავრობის მეთაურმა.
ისრაელის ჯანდაცვის სამინისტროში დასძინეს, რომ Pfizer-თან მოლაპარაკებებს მალე დაიწყებენ.
ცნობისთვის, Pfizer-ის მიერ შემუშავებული COVID-19-ის საწინააღმდეგო ექსპერიმენტული ანტივირუსული პრეპარატი, Paxlovid-ი დაავადების გართულებისა და გარდაცვალების რისკს 89%-ით ამცირებს.