იტალიური გამოცემები იუწყებიან, რომ მთავრობა მკაცრ შეზღუდვებს განაახლებს იმ რეგიონებში, სადაც ყოველკვირეულად 100,000 მოსახლეზე კორონავირუსის 250-ზე მეტი ახალი შემთხვევა დაფიქსირდება.
იტალიის მთავრობამ, რეგიონებში კორონავირუსის გავრცელების საფრთხის განსაზღვრის მიზნით, ოთხი ფერისგან შემდგარი სისტემა შემოიღო (თეთრი, ყვითელი, ნარინჯისფერი და წითელი).
რეგიონები, სადაც ყოველკვირეულად ყოველ 100,000 მოსახლეზე კორონავირუსის 250-ზე მეტი ახალი შემთხვევა დაფიქსირდება, ავტომატურად წითელ ზონად გამოცხადდება.
ადგილობრივი გამოცემა La Repubblica-ს ცნობით, გამორიცხული არ არის, რომ მარტის შუა რიცხვებიდან მთელი ქვეყნის მასშტაბით, 3-4 კვირის განმავლობაში წითელი ზონა ამოქმედდეს.
"მეორე ტალღა არასდროს შეჩერებულა, ახალი შტამის გამო შემთხვევების მატებას ვხედავთ, რასაც კიდევ უფრო მკაცრი ზომების შემოღებამდე მივყავართ", - განაცხადა იტალიის ჯანდაცვის მინისტრმა რობერტო სპერანცამ.
სპერანცამ ასევე აღნიშნა, რომ მთავრობა ეპიდემიოლოგიურ ვითარებას დააკვირდება და ლოქდაუნისა და კომენდანტის საათის გამკაცრების გადაწყვეტილებას მხოლოდ ამის შემდეგ მიიღებს.