ავღანეთში, დედაქალაქ ქაბულის აეროპორტის ასაფრენ ბილიკზე დიდი რაოდენობით ხალხი შეიჭრა. აშშ-ის სამხედროებმა, რომლებიც ქვეყნიდან სამოქალაქო პირების ევაკუაციის დროს წესრიგს უზრუნველყოფდნენ, ჰაერში გამაფრთხილებელი გასროლა მოახდინეს. ინფორმაციას სააგენტო France-Presse ავრცელებს.
"მე ვნახე, როგორ გაჭყლიტეს ერთი გოგო, ის გარდაიცვალა", - განუცხადა სააგენტოს თვითმხილველმა.
სოციალურ ქსელებში ვრცელდება ვიდეოები, რომლებზეც ჩანს, როგორ არღვევს ასობით ადამიანი ღობეებს და თვითმფრინავებამდე მივარდნას ცდილობს, რათა ავღანეთი დატოვებს. ფონად სროლის ხმა ისმის.
Desperate situation unfolding at #Kabul airport this morning. pic.twitter.com/JlAWtTHPBy
— Ahmer Khan (@ahmermkhan) August 16, 2021
ამჟამად ქაბულის აეროპორტიდან დასავლეთის მოქალაქეების მასობრივი ევაკუაცია მიმდინარეობს. ბრიუსელის წყაროების თანახმად, ეს აეროპორტი ავღანეთში ბოლო დიდი ობიექტია, რომელსაც ჯერჯერობით NATO-ს ძალები აკონტროლებს. მის უსაფრთხოებას აშშ-ის, დიდი ბრიტანეთისა და თურქეთის სამხედროები უზრუნველყოფენ.
ცნობისთვის, რადიკალურმა მოძრაობამ "თალიბანი" ავღანეთის დედაქალაქი ქაბული 15 აგვისტოს აიღო. ავღანეთის პრეზიდენტმა აშრაფ ღანიმ, შტაბის უფროსთან და ეროვნული უსაფრთხოების მრჩეველთან ერთად, ქვეყანა დატოვა და ტაჯიკეთში გაემგზავრა. ღანის თქმით, მან ქვეყანა ქაბულში სისხლისღვრის თავიდან ასაცილებლად დატოვა.
