აშშ-ის ლუიზიანას შტატში ქარიშხალ "იდას“ შედეგად, სულ მცირე, 2 ადამიანი გარდაიცვალა. შტატის გუბერნატორი, ჯონ ბელ ედვარდი აცხადებს, რომ დაღუპულთა რიცხვი, შესაძლოა, გაიზარდოს.
ლუიზიანაში სამძებრო-სამაშველო ოპერაციები გრძელდება. მაშველებს ავიაციაც ეხმარება. ამასთან, მთავრობამ ეროვნული გვარდიის 5 000-მდე ჯარისკაცი განალაგა, დღეს კი ამ რაოდენობის გაორმაგება იგეგმება.
ნიუ-ორლეანსა და მის შემოგარენში 1 მილიონზე მეტი საცხოვრებელი სახლი და ბიზნეს ობიექტი ელექტროენერგიის გარეშეა დარჩენილი და მის აღდგენას, სავარაუდოდ, რამდენიმე კვირა დასჭირდება.
ცნობისთვის, ქარიშხალი "იდა", რომელმაც 29 აგვისტოს ღამით აშშ-ის შტატ ლუიზიანას დაატყდა თავს, ტროპიკულ შტორმამდე შემცირდა.
