ლიეტუვის ხელისუფლებამ ბელარუსის ტერიტორიის გავლით აზიიდან და აფრიკიდან შემოსულ უკანონო მიგრანტებს სამშობლოში დაბრუნების სანაცვლოდ თანხა შესთავაზა. ამის შესახებ მიგრაციის საერთაშორისო ორგანიზაციის ადგილობრივი ბიუროს ხელმძღვანელმა, ეიტვიდას ბინგიალისმა რადიო LRT-ს ეთერში განაცხადა.
"კონკრეტული თანხა ჯერ განსაზღვრული არაა. ნებისმიერ შემთხვევაში ეს თანხა ნაღდი ფულის სახით არ გაიცემა", - განაცხადა მან.
მან განმარტა, რომ თანხა გამოყოფილია რეინტეგრაციის ხარჯების ასანაზღაურებლად იმ ქვეყანაში, საიდანაც მიგრანტი წამოვიდა.
"ეს, შესაძლოა, იყოს კომპენსაცია საცხოვრებლის ქირისთვის, პროფესიის სწავლებისთვის, ფინანსური მხარდაჭერა მეწარმეობის სფეროში ინიციატივის დასაწყებად", - განაცხადა მან.
როგორც წესი, ევროკავშირში გადასვლისთვის მიგრანტები უკანონო ტრაფიკის ორგანიზატორებს 10 ათას ევრომდე უხდიან. ამისთვის მათ ბინებისა და სახლების გაყიდვა უწევთ და სამშობლოში დაბრუნების შემთხვევაში საცხოვრებელი ადგილი აღარ აქვთ.