მექსიკის დედაქალაქის ინფრასტრუქტურული პროექტებისა და მომსახურების სამმართველოს უფროსი ხესუს ესტევა მიიჩნევს, რომ მეტროს ხაზზე ხიდის ჩანგრევა კონსტრუქციის დეფექტით იყო განპირობებული. ინფორმაციას Televisa ავრცელებს. ტრაგედიის ზუსტ მიზეზებს პროკურატურა და ექსპერტთა ჯგუფი დაადგენს.
ტრაგედია მეხიკოს სამხრეთ ნაწილში, მეტროპოლიტენის მე-12 ხაზზე 3 მაისს მოხდა. მეტროს ხიდის გასასვლელი ჩამოინგრა და ორი ვაგონი 10 მეტრის სიმაღლიდან გადავარდა. ოფიციალური მონაცემებით დაიღუპა 25 და დაშავდა 79 ადამიანი. მომხდართან დაკავშირებით ქვეყანაში 3 დღიანი გლოვა გამოცხადდა.
