ჯორჯ ფლოიდის გარდაცვალებასთან დაკავშირებით გამართული საპროტესტო აქციის მონაწილეებმა მინეაპოლისში 200-ზე მეტი შენობა გაძარცვეს და დააზიანეს. ამის შესახებ ინფორმაციას Minneapolis Star Tribune ავრცელებს.
გადამწვარია რამდენიმე შენობა, მათ შორის, აფთიაქები, სუპერმარკეტები, ტანსაცმლის მაღაზიები, სილამაზის სალონები, სამრეცხაოები, ბენზინგასამართი სადგურები, მანქანის სარემონტო დაწესებულებები, რესტორნები და ალკოჰოლური სასმლის მაღაზიები.
ასევე, აქციის მონაწილეებმა გადაწვეს ერთ-ერთი ბანკის შენობა, რომელიც პოლიციის განყოფილების მოპირდაპირედ მდებარეობს.
ჯორჯიის შტატის გუბერნატორმა, ბრაიან კემპმა მომხდარი არაულობის გამო საგანგებო მდგომარეობა გამოაცხადა ატლანტაში, კერძოდ ფულტონის ოლქში.
აქცია გაიმართა, ვაშინგტონშიც. თეთრი სახლის მიმდებარედ შეკრებილი დემონსტრანტები "მე ვეღარ ვსუნთქავ" - ლოზუნგით გამოვიდნენ. პოლიციამ ჩაკეტა თეთრი სახლის შესასვლელები.
მომიტინგეებსა და პოლიციელებს შორის ძალადობრივი შეტაკებები მოხდა რამდენიმე ქალაქში, მათ შორის ნიუ იორკში, ლოს ანჯელესში, ჩიკაგოში, დენვერში, ჰიუსტონში, ფენიქსში, კოლუმბუსსა და მემფისში.
მომიტინგეებმა, ატლანტაში "CNN"-ის ოფისის შემტვრევა სცადეს და პოლიციის მანქანა გადაწვეს.
ჯორჯ ფლოიდის მკვლელობის გამო საპროტესტო აქციები ნიუ-იორკშიც გაიმართა. პოლიციამ აქციის 150 მონაწილე დააკავა.
მინეაპოლისში ფერადკანიანი მამაკაცის გარდაცვალების საქმის გამოძიების ფარგლებში პოლიციის ოფიცერი დააკავეს.
დაკავებული დერეკ შოვენი ერთ-ერთია იმ ოთხ სამართალდამცველს შორის, რომლებსაც მომხდარის გამო უფლებამოსილება შეუჩერდათ.
შეგახსენებთ, რომ აშშ-ის ქალაქ მინეაპოლისში მასობრივი არეულობებია უკვე რამდენიმე დღეა გრძელდება.
მინეაპოლისში მასობრივი არეულობების ადგილებში აშშ-ის ეროვნული გვარდიის 500-მდე წევრი გააგზავნეს.
გასულ კვირას პოლიციამ 46 წლის ადგილობრივი ჯორჯ ფლოიდი მოკლა. ის მანქანაში იჯდა, როდესაც სამართალდამცავებმა ის საეჭვოდ ჩათვალეს. მამაკაცი ავტომობილიდან გადმოიყვანეს და ბორკილები დაადეს. ის ასფალტზე დააწვინეს. მოსახლეობა ამბობს, რომ პოლიციამ გადამეტებული ძალა გამოიყენა.
"სუნთქვა არ შემიძლია", - ამბობდა დაკავებული.
შემდეგ მან გონება დაკარგა და მოგვიანებით საავადმყოფოში გარდაიცვალა.
