მოსკოვის სასამართლომ რუსი ოპოზიციონერის, ალექსეი ნავალნის პრესმდივანს, კირა იარმიშს 1,5 წლით თავისუფლების აღკვეთა მიუსაჯა. მას 23 იანვარს საპროტესტო აქციების დროს სანიტარულ-ეპიდემიოლოგიური რეგულაციების დარღვევის წახალისებაში ადანაშაულებენ. ინფორმაციას ВВС ავრცელებს.
ბრალდება იარმიშისთვის 2 წლით თავისუფლების აღკვეთას ითხოვდა.
ნავალნის პრესმდივანი მეოთხე ბრალდებულია, ვინც ე.წ. სანიტარული საქმის ფარგლებში გაასამართლეს. ნავალნის ძმას 1 წლით თავისუფლების აღკვეთა, პოლიტიკოსის ორ თანამოაზრეს კი ერთი და 1.5 წლით თავისუფლების აღკვეთა მიუსაჯეს.
"სანიტარული საქმე" 2021 წლის იანვარში აღიძრა. გამოძიების ვერსიით, მისი ფიგურანტები მოსახლეობას ალექსეი ნავალნის მხარდამჭერ აქციაზე გამოსვლისკენ მოუწოდებდნენ, რითაც სანიტარულ-ეპიდემიოლოგიური რეგულაციების დარღვევას ახალისებდნენ.
26 ივლისს რუსეთის სამეთვალყურეო სააგენტომ "როსკომნადზორმა" ოპოზიციონერი პოლიტიკოსის, ალექსეი ნავალნის ვებგვერდი navalny.com დაბლოკა.
შეგახსენებთ, რომ რუსეთის საგამოძიებო კომიტეტმა რუსი ოპოზიციონერის, ალექსეი ნავალნის წინააღმდეგ სისხლის სამართლის ახალი საქმე აღძრა.
2014 წლის ბოლოს რუსეთის სასამართლომ ძმები ალექსეი და ოლეგ ნავალნები "ივ როშეს საქმეზე“ თაღლითობაში დამნაშავედ ცნო. ოლეგ ნავალნის 3,5 წლით პატიმრობა მიუსაჯეს, ალექსეი ნავალნის კი - პირობითი სასჯელი. რუსეთის სასჯელაღსრულების ფედერალურმა სამსახურმა სასამართლოს მიმართა, რადგან, უწყების განცხადებით გერმანიის კლინიკიდან გამოწერის შემდეგ ნავალნიმ რუსეთის ინსპექციაში არ გამოცხადდა.
რუსეთის სამართალდამცავი ორგანოების თანამშრომლებმა გერმანიიდან დაბრუნებული ოპოზიციონერი ალექსეი ნავალნი 17 იანვარს, ღამით "შერემეტიევოს" აეროპორტში, საპასპორტო კონტროლზე, პირობითი სასჯელის დარღვევის მიზეზით დააკავეს.
მოსკოვის საქალაქო სასამართლომ ალექსეი ნავალნის პირობითი სასჯელი რეალურით შეუცვალა. რუს ოპოზიციონერს საერთო რეჟიმის კოლონიაში 3.5 წლით თავისუფლების აღკვეთა მიესაჯა.
დასავლეთი ნავალნის დაკავებას გმობს და მის გათავისუფლებას ითხოვს.
მიმდინარე წლის აგვისტოში, მოსკოვში მიმავალი რუსი ოპოზიციონერი, ალექსეი ნავალნი თვითმფრინავში ცუდად გახდა და ავიალაინერის სასწრაფოდ დაშვება გახდა საჭირო. ნავალნი ომსკის საავადმყოფოში ტოქსიკოლოგიურ განყოფილებაში მოათავსეს, საიდანაც სამკურნალოდ ბერლინის საავადმყოფოში გადაიყვანეს. გერმანიაში ჩატარებულმა სამედიცინო კვლევამ დაადგინა, რომ რუსი ოპოზიციონერი ნერვული აგენტით, "ნოვიჩოკით" იყო მოწამლული და ფაქტი კრემლის მხრიდან ოპოზიციონერის მკვლელობის მცდელობად შეფასდა. რუსეთის ხელისუფლება ბრალდებებს უარყოფს და აცხადებს, რომ ინციდენტთან კავშირი არა აქვს.
