Pfizer-ის მიერ შემუშავებული COVID-19-ის საწინააღმდეგო ექსპერიმენტული ანტივირუსული პრეპარატი, Paxlovid-ი დაავადების გართულებისა და გარდაცვალების რისკს 89%-ით ამცირებს. ამის შესახებ საინფორმაციო სააგენტო Reuters წერს.
კვლევაში 1 219-მა კორონავირუსით ინფიცირებულმა მსუბუქი და საშუალო სიმძიმის პაციენტმა მიიღო მონაწილეობა. აღმოჩნდა, რომ ჰოსპიტალიზაცია, კოვიდის გართულებების გამო, კვლევაში მონაწილეთა მხოლოდ 0,8%-ს დასჭირდა და მათგან არავინ გარდაცვლილა.
კვლევის ავტორები აღნიშნავენ, რომ პრეპარატის მიღება ინფიცირებიდან უმოკლეს დროში არის რეკომენდებული.
გამოცემა აღნიშნავს, რომ Pfizer-ის მიერ წარმოებულმა აბმა ფარმაცევტული კომპანია Merck-ის მიერ შემუშავებულ "მოლნუპირავირის" პრეპარატზე უკეთესი შედეგები აჩვენა.
Pfizer აშშ-ს სურსათისა და მედიკამენტების ასოციაციას შუალედური ცდების შედეგებს წარუდგენს.
ფარმაცევტულ კომპანიაში განმარტავენ, რომ მედიკამენტის დამტკიცების შემთხვევაში Paxlovid-ის მიღება დღეში ორჯერ იქნება რეკომენდებული.
შეგახსენებთ, დიდი ბრიტანეთი მსოფლიოში პირველი ქვეყანა გახდა, რომელმაც COVID-19-ის წინააღმდეგ სამკურნალოდ მოლნუპირავირის გამოყენება დაამტკიცა.
