რუსეთი "ღია ცის შესახებ" ხელშეკრულებიდან გასვლის შიდასახელმწიფოებრივ პროცედურებს იწყებს. ინფორმაციას ამის შესახებ რუსეთის საგარეო საქმეთა სამინისტრო ავრცელებს.
განცხადებაში უწყება წერს, რომ 2020 წლის 22 ნოემბერს ხელშეკრულება აშშ-მა დატოვა.
"ვაშინგტონის გადაწყვეტილებამ დოკუმენტის მოქმედებას სერიოზული ზიანი მიაყენა, "ღია ცის შესახებ" ხელშეკრულების როლი, როგორც ნდობისა და უსაფრთხოების ინსტრუმენტისა, შეირყა", - აღნიშნავენ რუსეთის საგარეო საქმეთა სამინისტროში.
შეგახსენებთ, რომ აშშ-მა 2020 წლის 22 ნოემბერს "ღია ცის შესახებ" ხელშეკრულება ოფიციალურად დატოვა. ეს ნიშნავს იმას, რომ სამხედრო მოქმედებების მონიტორინგის მიზნით, ხელშეკრულების მხარე ქვეყნების ტერიტორაზე გადაფრენა აშშ-ს აღარ შეეძლება. ვაშინგტონი ხელშეკრულებიდან გასვლის მიზეზად რუსეთის მიერ დოკუმენტის შეუსრულებლობას ასახელებს.