საბერძნეთში, კორინთის ყურის სანაპიროსთან, ათენიდან 80 კილომეტრის დაშორებით ტყის ძლიერ ხანძარს ებრძვიან. ინფორმაციას ამის შესახებ ადგილობრივი მედია ავრცელებს.
"გუნდი ხანძრის ჩაქრობის მცდელობებს აძლიერებს კორინთის ყურეში. იქ მობილიზებულია 182 მეხანძრ-მაშველი, 62 მანქანა, რვა სახანძრო თვითმფრინავი, სამი ვერტმფრენი საჰაერო კოორდინაციისთვის", - განაცხადეს სახანძრო სამსახურში.
ხანძარი ფიჭვნარის ტყეში ადგილობრივი დროით დაახლოებით საღამოს 10 საათზე გაჩნდა. ძლიერი ქარის გამო ხანძარი სწრაფად გავრცელდა. ხელისუფლებამ ახლომდებარე 6 სოფელსა და ორ მონასტერში ხალხის ევაკუაცია განახორციელა. ადამიანების სიცოცხლეს საფრთხე არ ემუქრება.
ადგილობრივი ხელისუფლების ცნობით, ხანძრის ფართობი 10 კილომეტრს აჭარბებს.
ხანძრის გამომწვევი მიზეზი ჯერჯერობით უცნობია.