საფრანგეთში 9 წლის ბავშვი გარდაიცვალა. მას კავასაკის სინდრომი და COVID-19 დაუდასტურდა. ამის შესახებ საფრანგეთის ჯანდაცვის დეპარტამენტში განაცხადეს.
ბიჭი მარსელის სამედიცინო დაწესებულებაში იმყოფებოდა.
ადგილობრივი მედიის ცნობით, აპრილის ბოლოდან მარსელში კავასაკის სინდრომი 100-ზე მეტ ბავშვს დაუდასტურდა. მანამდე ეს დაავადება წელიწადში სამჯერ თუ ფიქსირდებოდა.
ევროპაში ბავშვების უცნობი სინდრომით დაავადების შემთხვევები ფიქსირდება.
მსგავსი შემთხვევები გამოვლინდა იტალიაშიც. ბერგამოს საავადმყოფოს ერთ-ერთი ექიმის თქმით, ბერგამოს პროვინციაში პანდემიის დროს კავასაკის სინდრომის შემთხვევებმა, წინა წლებთან შედარებით, ბავშვებში 30-ჯერ იმატა. მათი თქმით, 2015 წლის პირველი იანვრიდან 2020 წლის 17 თებერვლამდე საავადმყოფოში კავასაკის სინდრომის მსგავსი დაავადებით 19 ბავშვი მოხვდა.
აშშ-ში, ნიუ–იორკის შტატში ამჟამად უცნობი ანთებითი სინდრომით, რომელიც, სავარაუდოდ, კორონავირუსთან არის დაკავშირებული, დაახლოებით 100 მცირეწლოვანი და მოზარდი დაავადდა. ამის შესახებ შტატის გუბერნატორმა, ენდრიუ კუომომ განაცხადა.
აშშ-ში, ნიუ-იორკის შტატში ჯერჯერობით უცნობი სინდრომით მცირეწლოვანის გარდაცვალების პირველი სამი შემთხვევა დაფიქსირდა.
ბოლო დროს ვრცელდება ინფორმაცია, რომ COVID-19 ბავშვებში უცნაურ და საშიშ სიმპტომებს ავლენს. სულ უფრო მეტი მეცნიერი აცხადებს, რომ ფიქსირდება შემთხვევები, როდესაც კოვიდინფიცირებულ ბავშვებს კავასაკის სინდრომი უვითარდებათ.
