სამხრეთ კორეაში კორონავირუს COVID-19-ის გავრცელების საფრთხის გამო პარლამენტის შენობა, სულ მცირე 24 საათით, დახურული იქნება. ადგილობრივი დროით 18:00-ზე აქ სადეზინფექციო სამუშაოები დაიწყება. საკანონმდებლო ორგანო 25 თებერვალსაც იქნება დახურული.
გადაწყვეტილება მას შემდეგ მიიღეს, რაც ცნობილი გახდა, რომ 19 თებერვალს საკანონმდებლო ორგანოში ღონისძიებაზე იმყოფებოდა პირი, რომელიც COVID-19-ით იყო ინფიცირებული.
დეპუტატების და პოლიტიკოსის უმეტესობამ ანალიზები ჩააბარა და ამჟამად პასუხს ელოდება. თუკი რომელიმეს კორონავირუსი დაუდასტურდება, პარლამენტსა და კანონმდებლებს ხანგრძლივ კარანტინში მოათავსებენ.
ბოლო მონაცემებით, სამხრეთ კორეაში კორონავირუს COVID-19-ით უკვე 833 ადამიანია დაავადებული, 8 გარდაიცვალა, 22 პაციენტი გაწერილია, 11 631-ის ანალიზის პასუხს ამ დრომდე ელოდებიან.
სამხრეთ კორეაში ეპიდემიოლოგიური საფრთხის დონე, "ნარინჯისფერიდან“ "წითლამდე“ გაზარდეს.
