თურქეთში, კორონავირუსის ახალი შემთხვევების კლების გამო, 17 მაისიდან მკაცრი კარანტინი გაუქმდება. ამის შესახებ განცხადებას თურქეთის შინაგან საქმეთა სამინისტრო აქვეყნებს.
შეზღუდვების მოხსნა ეტაპობრივად არის დაგეგმილი. არასასურსათო და სასურსათო დანიშნულების მაღაზიები შაბათ-კვირას 10:00-დან 17:00 საათამდე იმუშავებენ, სამუშაო დღეებში კომენდანტის საათი 21:00-დან 05:00 საათამდე იმოქმედებს, კვების ობიექტები მთელი კვირის განმავლობაში 07:00-დან 20:00 საათამდე იმუშავებენ. 17 მაისიდან 1 ივნისის ჩათვლით კაფეები, ჩაის სახლები, კინო კლუბები, ინტერნეტ კაფეები, საცურაო აუზები და სპორტული დარბაზები დაკეტილი დარჩება.
18 წლამდე პირებისთვის, 65 წელს გადაცილებული მაცხოვრებლებისა და COVID-19-ზე სრულად ვაქცინირებული პირებისათვის კომენდანტის საათი არ იმოქმედებს.
ბოლო მონაცემებით, თურქეთში კორონავირუსი 5 106 862 ადამიანს დაუდასტურდა, მათგან 4 932 838 პირი გამოჯანმრთელდა, ხოლო, 44 537 გარდაიცვალა.