ისრაელში კორონავირუს COVID-19-ით ინფიცირების პირველი შემთხვევა დაფიქსირდა. ამის შესახებ ქვეყნის ჯანდაცვის სამინისტროში განაცხადეს. ინფორმაციას Israel National News ავრცელებს.
ინფიცირებული ქალია, რომელიც ისრაელში საკრუიზო ლაინერ "Diamond Princess-დან" კიდევ 10 თანამოქალაქესთან ერთად დაბრუნდა. დანარჩენებს კორონავირუსი არ დაუდგინდათ.
ისრაელის ჯანდაცვის სამინისტროში აღნიშნეს, ქალი ამჟამად სამედიცინო ცენტრში, იზოლაციაში იმყოფება. ლაინერის დანარჩენი მგზავრები კარანტინში რჩებიან.
ამჟამად იაპონიის საავადმყოფოებში მკურნალობას ისრაელის 4 მოქალაქე გადის, რომლებიც ასევე "Diamond Princess-ის" მგზავრები იყვნენ.
ჩინეთში, ბოლო მონაცემებით, კორონავირუსით დაავადებულთა რიცხვმა 75400-ს მიაღწია, გარდაიცვალა 2236 ადამიანი. ამათგან გარდაცვალების 118 და დაინფიცირების 1600 ახალი შემთხვევა ბოლო ერთ დღე-ღამეში დაფიქსირდა. საავადმყოფოდან გაწერეს 2109 პაციენტი.