1 აგვისტოდან საუდის არაბეთში მაღაზიებში, სავაჭრო ცენტრებსა და სხვა მსხვილ სავაჭრო ობიექტებში სიარულს მხოლოდ ისინი შეძლებენ, ვინც კორონავირუსის საწინააღმდეგო ვაქცინაცია ჩაიტარა. ამის შესახებ სამეფოს ვაჭრობის სამინისტროს პრესმდივანმა, აბდელ რაჰმან ალ-ჰუსეინმა განაცხადა. ინფორმაციას Akhbar Al Saudiya ავრცელებს.
"ისინი, ვინც კორონავირუსის საწინააღმდეგო ვაქცინაცია არ ჩაიტარა, დიდ სავაჭრო ობიექტებსა და პროდუქციით ვაჭრობის ობიექტებს ვეღარ ეწვევა. 1 აგვისტოდან შენობაში შესვლის პირობა, სადაც ვაჭრობა მიმდინარეობს, ვაქცინაციის, სულ მცირე, ერთი დოზის მიღება იქნება", - აღნიშნა მან.
შეგახსენებთ, 1 აგვისტოდან საუდის არაბეთის მოსახლეობა კორონავირუსის ვაქცინაციის დამადასტურებელი საბუთის გარეშე სახელმწიფო დაწესებულებებს, ეკონომიკურ, საზოგადოებრივ, კულტურულ და სხვა ღონისძიებებს ვერ ეწვევა. ამასთან, მომავალი სასწავლო სემესტრიდან სწავლება საუდის არაბეთში საკლასო ოთახებში და აუდიტორიებში აღდგება.