"ქართული ოცნების" ოფისთან აქცია მიმდინარეობს.
მედიის სოლიდარობისთვის გამართული აქციის მონაწილეები "ქართული ოცნების' ცენტრალურ ოფისთან მსვლელობით მივიდნენ.
აქციის მონაწილეები სკანდირებენ: "მონებო!", "წადით!"
ადგილზე დიდი რაოდენობით სამართალდამცველები არიან მობილიზებულნი.
ცნობისთვის, რუსთაველის გამზირზე, პარლამენტთან მიმდინარე აქციის მონაწილეებმა მმართველი პარტიის ოფისთან, შსს-ში გამართული ბრიფინგის შემდეგ გადაინაცვლეს.
აქციის მონაწილეების განცხადებით, ლექსო ლაშქარავას გარდაცვალების მიზეზებთან დაკავშირებით შსს-ს ვერსია მიუღებელია.
შეგახსენებთ, 5 ივლისს, თბილისში, რუსთაველის გამზირზე, "თბილისი პრაიდის" კვირეულის მოწინააღმდეგე რადიკალური ჯგუფები ჟურნალისტებს თავს დაესხნენ.
შსს-ს ინფორმაციით, 5 ივლისს, ძალადობის მსხვერპლი 55 ადამიანი გახდა, მათ შორის 53 მედიის წარმომადგენელია.
რადიკალური ჯგუფები, მედიის წარმომადგენლებს 6 ივლისსაც დაესხნენ თავს.
"ტვ პირველის" ოპერატორს, ლექსო ლაშქარავას 5 ივლისის მოვლენებისას ფიზიკურად გაუსწორდნენ.
ის რამდენიმე დღის განმავლობაში "ნიუ ჰოსპიტალსში" მკურნალობდა.
11 ივლისს კი საკუთარ სახლში გარდაცვლილი ნახეს.
უკვე მეორე დღეა პარლამენტთან, 5-6 ივლისს, ქვეყანაში მომხდარ ძალადობრივ ფაქტებს აპროტესტებენ.