,,კიდევ ერთი აბსურდული და შეშინებული განცხადება პოლიტიკური პროკურატურის", - ასე გამოეხმაურნენ ,,ნაციონალურ მოძრაობაში", საქართველოს პროკურატურაში, ნიკა მელიას საქმეზე გამართულ ბრიფინგს.
როგორც პარტიის ერთ-ერთმა ლიდერმა, ხატია დეკანოიძემ განაცხადა, ნიკა მელიას მიღებული გადაწყვეტილება არ შეიცვლება და ის გირაოს არ გადაიხდის.
,,ამ განცხადებამ კიდევ ერთხელ დაადასტურა, რომ საქართველოში, პროკურატურა, როგორც ინსტიტუტი, არ არსებობს და პროკურატურა ემსახურება მხოლოდ და მხოლოდ პოლიტიკურ მართლმსაჯულებას, ისევე, როგორც სასამართლო და მართლმსაჯულების ყველა რგოლი.
ნიკა მელიას გადაწყვეტილება, რომელიც გულისხმობდა იმას, რომ გავრილოვის შეკვეთით გირაოს გადახდა იყო უსამართლო, რა თქმა უნდა, რჩება უცვლელი.
მისი გადაწყვეტილება იდეისთვის, თავისუფლებისთვის ბრძოლა, რჩება იგივე. იგი არასდროს გახდება ბიძინა ივანიშვილის უსამართლობის თამაშის მონაწილე", - განაცხადა ხატია დეკანოიძემ.
ცნობისთვის, როგორც საქართველოს პროკურატურაში განაცხადეს, უწყებამ მიიღო გადაწყვეტილება მიმართოს სასამართლოს, ,,ნაციონალური მოძრაობის" თავმჯდომარის, ნიკა მელიას მიმართ გამოყენებული პატიმრობა კვლავ შეიცვალოს გირაოთი.
დღეს „ერთიანი ნაციონალური მოძრაობის“ თავმჯდომარის, ნიკა მელიას ადვოკატების საჩივარი თბილისის სააპელაციო სასამართლომ დასაშვებად არ ცნო.
შეგახსენებთ, რომ "ნაციონალური მოძრაობის" თავმჯდომარე ნიკა მელია პარტიის ოფისში 23 თებერვალს დააკავეს.
თბილისის საქალაქო სასამართლოს მოსამართლე ნინო ჩახნაშვილმა 17 თებერვალს სრულად დააკმაყოფილა პროკურატურის მოთხოვნადა მას პატიმრობა შეუფარდა. საქართველოს გენერალური პროკურატურა ნიკა მელიასთვის პატიმრობის შეფარდებას, დაცვის მხარე, კი აღკვეთის ღონისძიების გაუქმებას ითხოვდა. პროცესს თავად ბრალდებული არ ესწრებოდა.
პროცესზე ,,ნაციონალური მოძრაობის“ თავმჯდომარის ადვოკატებმა მოსამართლე ნინო ჩახნაშვილის აცილება მოითხოვეს. როგორც ისინი აცხადებდნენ, პარტიის ოფისთან, სპეციალური დანიშნულების რაზმი იყო მობილიზებული, რაც იმაზე მიუთითებდა, რომ გადაწყვეტილება მელიას დაპატიმრების შესახებ წინასწარ იყო ცნობილი. მოსამართლემ ადვოკატების შუამდგომლობა არ დააკმაყოფილა და მელიას პატიმრობა შეუფარდა.
პრემიერ-მინისტრ გიორგი გახარიას გადადგომასთან დაკავშირებით შინაგან საქმეთა სამინისტრომ სასამართლო გადაწყვეტილების აღსრულება რამდენიმე დღით გადადო.
საქართველოს პარლამენტმა 16 თებერვალს ნიკა მელიას იმუნიტეტი მოუხსნა.
შეგახსენებთ, რომ 2019 წლის 20-21 ივნისის მოვლენებთან დაკავშირებით, ნიკა მელიას ბრალად ედება საზოგადოებრივი უშიშროების და წესრიგის წინააღმდეგ მიმართული მძიმე კატეგორიის, ძალადობრივი დანაშაულის ჩადენა.
თბილისის საქალაქო სასამართლომ ნიკა მელიას 2019 წლის 27 ივნისს, აღკვეთის ღონისძიების სახით 30 000-ლარიანი გირაო შეუფარდა.
პროკურატურის განცხადებით, ,,ნაციონალური მოძრაობის" თავმჯდომარეს გირაოს პირობების შეუსრულებლობის გამო მანამდე გამოყენებული აღკვეთის ღონისძიება გაუმკაცრდა და გირაოს ოდენობა 40 000 ლარით გაიზარდა. აღნიშნულთან დაკავშირებით ნიკა მელია პროკურატურაში დაიბარეს თუმცა არ გამოცხადდა. ამავე დღეს, პროკურატურამ ნიკა მელიას გირაოს პირობების შესასრულებლად დამატებითი ერთკვირიანი ვადა მისცა.
,,ერთიანი ნაციონალური მოძრაობის" თავმჯდომარე აცხადებდა, რომ დაკისრებული გირაოს გადახდას არ აპირებდა და თუ ვინმე მის ნაცვლად გადაიხდიდა, ეს იქნებოდა "ქართული ოცნების" მხრიდან მოწყობილი პროვოკაცია.
ნიკა მელია ამჟამად რუსთავის მე-12-ე სასჯელაღსრულების დაწესებულებაშია გადაყვანილი.