DASH დიეტა - კვების რეჟიმი მაღალ წნევიანებისთვის. თავდაპირველად ზუსტად ამიტომ შეიქმნა ეს დიეტა, მაგრამ პროცესში წონის კლება დაფიქსირდა და ამიტომ გახდა პოპულარული გასახდომი საშუალება. იგი ჯანსაღი კვების გეგმაა, რომლის ძირითადი ინგრედიენტებიც პოტასიუმით, კალციუმითა და მაგნიუმით მდიდარი საკვებია, იზღუდება ნაჯერი ცხიმების და შაქრის და შაქრის შემცველი პროდუქტების მიღება.
ორი სიტყვით შაქარსა და ნაჯერ ანუ სატურირებულ ცხიმებზე. ნაჯერი ცხიმები ძირითადად ხორცსა და რძის პროდუქტებში გვხვდება, მათი დიდი ოდენობით მიღება იწვევს სისხლში ცუდი ანუ LDL ქოლესტერინის დონის მომატებას, რაც თავისთავად იწვევს სისხლძარღვების გამტარობის შემცირებას და გულისა და სისხლძარღვთა დაავადებების წარმოქმნის რისკს ქმნის. რაც შეეხება შაქარს, მისი ათვისება სწრაფად ხდება ორგანიზმის მიერ და ენერგიის სწრაფი წყაროა, ორგანიზმს ყველაფერი ზომიერად სჭირდება, დანარჩენ შაქარს კი ინახავს, აღარ წვავს საკუთარ ცხიმს და ხდება ამ ცხიმის დაგროვება. ზედმეტი ცხიმი კი გარდა წონაში მატებისა ისევ და ისევ იწვევს გულისა და სისხძარღვთა დაავადებების რისკს.
ახლა კი დეტალურად კვების გეგმის შესახებ:
დღიურად მისაღები კალორიები - 2000 კკალ
- ბურღულეული - 250 – 300 გრ. (მითითებულია გამზადებული პროდუქტის წონა) ნებისმიერი ბურღულეული
- ბოსტნეული - 400– 500 გრ. ნებისმიერი ფოთლოვანი ბოსტნეული, 200-250 გრ. სხვა ბოსტნეული - ცოცხალი, გაყინული ან გამომცხვარი, ან 200-300 გრ. ახლად გამოწურული წვენი
- ხილი - 200 – 250 გრ. ნებისმიერი ხილი - ცოცხალი, გაყინული ან დაკონსერვებული შაქრის გარეშე, ან 200-300 გრ. ახლად გამოწურული წვენი
- ნაკლებად ცხიმიანი რძის პროდუქტი. არ მიიღოთ უცხიმო რძის პროდუქტი, ჯობს პროდუქტის რაოდენობა შევამციროთ. დღეში 500 გრ. რძე ან მაწონი, 50 გრ. ყველი, 100 გრ, ხაჭო
- ხორცი, ქათამი, თევზი - მჭლე და ნაკლებად ცხიმიანი და კანგაცლილი დღეში 150-180 გრ. 1 ც. კვერცხი.
- თხილეული, მარცვლეული და პარკოსნები - დღეში 30-40 გრ. თხილეული, 25 გრ. არაქისის კარაქი, 70 გრ. პარკოსნები (მაგ. ლობიო, ბარდა, ოსპი და სხვ.)
- ზეთი, კარაქი და სხვა ცხიმები: 2-3 ჩ/კ ნებისმიერი ცხიმი და 2 – 3 სუფრის კოვზი სალათის საკმაზი
- ტკბილეული და დამატკბობლები: 1 ჩ/კ შაქარი, თაფლი, მურაბა ან ჯემი დღეში. კვირაში ერთი ნაკლებად კალორიული დესერტი, მაგალითისთვის ლიმონათი ან სორბეტი.
მოცემული პროდექტი და რაოდენობა გადაანაწილეთ ულუფებად თქვენი სურვილის მიხედვით. თუმცა გაითვალისწინეთ სწორი კვების პრინციპები - სწორად გაყავით თეფში და თითო ულუფაზე მიიღეთ ცილებიც, ცხიმებიც და ნახშირწყლებიც. საღამოს კვებაზე ეცადეთ ნაკლები ხილი და ბოსტნეული. ასევე ხილი უმჯობესია მიირთვათ ცალკე ულუფად და არა დესერტის სახით ძირითად კერძთან.
მზა პროდუქტის შეძენისას ყურადღება მიაქციეთ ეტიკეტზე დატანილ შემადგენლობას, შაქრის და ცხიმის შემცველობას.
გაფრთხილება: სტატიაში მოცემული კვების რეჟიმი ატარებს რეკომენდაციულ ხასიათს. ჩვენი ორგანიზმი ინდივიდუალურია, ამიტომ საუკეთესოა თქვენთვის შესაფერისი კვების რეჟიმი სპეციალისტის დახმარებით შეარჩიოთ. გაუთავებელი და თვითნებური დიეტებით ხდება ორგანიზმის გამოფიტვა, მუდმივ სტრესში ყოფნა, და შედეგად დგება კვებითი აშლილობა.
ჯანმრთელობას გისურვებთ !
გვანცა ჭანტურია
ავტორი