ხობის მუნიციპალიტეტის სოფელ ჭალადიდში ავტოსაგზაო შემთხვევა მოხდა. მსუბუქი ავტომობილი ხეს შეეჯახა, რა დროსაც 7 ადამიანი დაშავდა, მათ შორის ორი არასრულწლოვანია.
დაშავებულები სასწრაფო სამედიცინო დახმარების ჯგუფმა საავადმყოფოში გადაიყვანა.
როგორც report.ge-ს ფოთის ჰოსპიტალში განუცხადეს, დაშავებულებიდან ერთის მდგომარეობა საყურადღებოა.
,,შემოიყვანეს 7 ადამიანი, აქედან 2 არის არასრულწლოვანი. დანარჩენები არიან 45-წლამდე ასაკის ადამიანები. ერთი ქალბატონის ჯანმრთელობის მდგომარეობა არის საყურადღებო, რომელიც ინტენსიურ განყოფილებაში იმყოფება დაკვირვების ქვეშ, მას აღენიშნება გულ-მკერდისა და კისრის ტრავმები. რაც შეეხება დანარჩენს პაციენტებს, მათ მხოლოდ მსუბუქი დაზიანებები აღენიშნებათ. სხეულის ზედაპირული დაზიანებები აქვთ ბავშვებსაც. შვიდივე პაციენტი იმყოფება დაკვირვების ქვეშ", - განაცხადა თეა მიგინეიშვილმა.
როგორც report.ge-ს შინაგან საქმეთა სამინისტროში განუცხადეს, მომხდართან დაკავშირებით გამოძიება სისხლის სამართლის კოდექსის 276-ე მუხლის მე-2 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია ჯანმრთელობის დაზიანება.
ვახო რევაზიშვილი
ავტორი