ბაჩანა ლობჟანიძემ, რომელიც საზოგადოებას თამარ ბაჩალიაშვილის შეყვარებულად გაეცნო, პროკურატურიდან გამოსვლის შემდეგ მედიასთან კომენტარი გააკეთა.
ლობჟანიძის თქმით, თამარ ბაჩალიაშვილმა იანვარში შეიძინა ელექტროშოკი და როგორც მედიიდან გაჟღერდა, იმ მომენტში ის ესაუბრებოდა ნორვეგიაში მყოფ ქართველს.
"დავიკითხე ხელახლა, მთლიანად. ასეთი დაკითხვა მანამდე არ ყოფილა. მკითხეს თუ რა ვიცოდი თამარის საქმიანობის შესახებ, როდის დაიწყო მუშაობა, რაზეც სრულყოფილი პასუხი გავეცი. ჩამომათვლევინეს ჩემი მეგობრების სახელი და გვარები, სად მუშაობდნენ, რომელი უნივერსიტეტი დაამთავრეს.
ალბათ, სურთ, რომ ჩემმა მეგობრებმა დამახასიათონ. ვფიქრობ, რომ ეს გამოკითხვა იყო მიმართული იმისკენ, რასაც ითხოვს მედია, ასევე მშობლები, რომ დაედგინათ ჩემი პიროვნება. აქეთაც იყო აქცენტები და ასევე ზოგადად საქმესთან მიმართებაში.
ჩატარდა თუ არა ექსპერტიზა, გახსნილია თუ არა ლუქი, არ ვიცი. მობილური არ არის ნივთმტკიცება, რადგან ეს არ არის დანაშაულებრივი ობიექტი. მე განვაცხადე, რომ თუ მობილურში რაიმე ინფორმაცია მაქვს, ვთანამშრომლობ გამოძიებასთან და მე თვითონ მივაწვდიდი ამ ინფორმაციას. ყველა დეტალზე, რომელზეც ვერ მოვახერხე საუბარი, ახლა ამომწურავად და ზედმიწევნით ვისაუბრე.
ასევე დავაფიქსირე, რომ თამარმა იანვარში შეიძინა ელექტროშოკი. როგორც მედიიდან გაჟღერდა, იმ მომენტში ის ესაუბრებოდა ნორვეგიაში მყოფ ქართველს და სურდა გაეგო პოლიტიკური თავშესაფრის შესახებინფორმაცია.
რისთვის სჭირდებოდა ელექტროშოკი, ამაზე საუბარი თამარს ჩემთან არ ჰქონია, მაგრამ მე მაქვს ვარაუდი, რომ არსებობდა ფიზიკური პირის მხრიდან რაიმე სახის საფრთხე" - განაცხადა ლობჟანიძემ.