დედოფლისწყაროს მუნიციპალიტეტში ავტომანქანა დაიწვა. შემთხვევა შირაქის ველზე მოხდა.
თვითმხილველების ინფორმაციით, ცეცხლი გამხმარი ბალახით დატვირთულ ავტომობილს გაუჩნდა.
ავტომანქანის მფლობელს ბალახი მინდვრიდან სახლში გადაჰქონდა. ფორდში მყოფმა მგზავრებმა მანქანის დატოვება დროულად მოახერხეს.
დღეს, დედოფლისწყაროდან რამდენიმე კილომეტრში, შირაქის ველზე რამდენიმე ხანძარი იყო. ცეცხლი უკვე ლიკვიდირებულია. შემთხვევის ადგილზე 8 სახანძრო-სამაშველო ეკიპაჟი იყო მობილიზებული და ამ დროისთვის, ხანძრის გავრცელების საშიშროება აღარ არსებობს.
არსებული ინფორმაციით, ბოლო დღეებში, ქერისა და ხორბლის აღებულ ტერიტორიაზე, ადგილის გასასუფთავებლად, ცეცხლს თავად მეპატრონეები აჩენენ, ზოგ შემთხვევაში კი, ხანძარი მაღალი ტემპერატურის გამო ჩნდება.
ადგილობრივების თქმით, დამწვარია მოსავლის ნაწილიც.
