ეკონომიკის მინისტრის ნათია თურნავას განცხადებით, ავიაკომპანია Wizzair-ის ფრენების აღდგენა იმ ქვეყნებზეა დამოკიდებული, რომლებიც საქართველოს მოქალაქეებს უპირობოდ გაუხსნიან საზღვარს. როგორც მინისტრმა განაცხადა, თუ ასეთი ქვეყნების არეალი გაფართოვდება, ფრენების აღდგენას აზრი ექნება.
მინისტრის თქმით, Wizzair-ი ძალიან მნიშვნელოვანი პარტნიორია და საქართველო მოწადინებულია, რომ ფრენები მალე აღდგეს.
"Wizzair-ი არის დაბალბიუჯეტიანი ავიაკომპანია, რომელსაც აქვს თავისი შეზღუდვები და იმითაა მიმზიდველი, რომ ბილეთის ფასი არის დაბალი, ერთი და ორი ფრენა კვირაში მას არ შეუძლია, ეს მისი ბიზნესმოდელის საწინააღმდეგოა, ამიტომ თუ Wizzair-ი აღადგენს ფრენებს, ეს მოხდება მაშინ, როცა რამდენიმე მიმართულება გვექნება მაგიდაზე დადებული და შეთანხმებული, იციან, მუშაობენ ჩვენთან ერთად, ჩაერთნენ ახლა სოციალური ჩარტერების შესრულებაში. თუ მოგვეცემა საშუალება, გავაფართოვოთ არეალი, პირველ რიგში, wizzair-ის ფრენები აღდგება" - განაცხადა ეკონომიკის მინისტრმა.
