ინფექციური პათოლოგიის და შიდსის ცენტრის ინფექციონისტის, ალექსანდრე გოგინავას განმარტებით, თუ ვაქცინაციის ტემპი არ მოიმატებს და მოსახლეობის მასობრივი აცრა ვერ მოხერხდება, რესპირატორული ვირუსების სეზონის მოახლოებასთან ერთად ვითარება გართულდება და ჰოსპიტალური სექტორი გადაიტვირთება.
"შემოდგომის მეორე ნახევრიდან ზოგადად იწყება აქტიურობა სხვადასხვა რესპირატორული ინფექციების, მათ შორის გრიპის ვირუსის და მსგავსი სხვა დაავადებების გამომწვევი ვირუსული ინფექციების აქტივაცია, ამიტომ ამ პერიოდში, რა თქმა უნდა, თუ ჩვენ მოსახლეობის დიდი ნაწილი არ გვეყოლება ვაქცინირებული, რთულია ხოლმე რესპირატორული ინფექციების კლინიკურად ერთმანეთისგან გარჩევა, ეს გამოიწვევს ჰოსპიტლების გადატვირთვას და ჩვენთვის, სამედიცინო პერსონალისთვის ეს იქნება საკმაოდ მძიმე პერიოდი და სამწუხაროდ, ეს იქნება რთული ჩვენი მოსახლეობისთვის," - განაცხადა ინფექციური პათოლოგიის და შიდსის ცენტრის ინფექციონისტმა ალექსანდრე გოგინავამ.
