პედაგოგები, მეცნიერები, კულტურის სფეროს მოღვაწეები და გამოჩენილი სპორტსმენები ქალთა მიმართ ძალადობის წინააღმდეგ გლობალურ კამპანიას უერთდებიან. განათლების, მეცნიერების, კულტურისა და სპორტის სამინისტროს ორგანიზებით, საზოგადოებრივ აქტივობაში ჩაერთვება უმაღლესი სასწავლო დაწესებულებები, საჯარო სკოლები, პროექტი ტელე-სკოლა, თეატრები, მუზეუმები, სპორტული ფედერაციები და კლუბები.
კამპანია, რომელიც 25 ნოემბრიდან 10 დეკემბრის ჩათვლით იმართება, ონლაინ-ფორმატში ჩატარდება. მისი თემატიკაა საზოგადოების როლი და ჩართულობა ძალადობის აღმოფხვრაში გლობალური პანდემიის დროს.
ქალთა უფლებების დაცვის თემაზე, ონლაინ-საჯარო ლექციებს გამართავს რამდენიმე მუზეუმი. თეატრები გამართავენ იმ სპექტაკლების ონლაინ ჩვენებას, სადაც ქალთა უფლებებზეა გამახვილებული ყურადღება. ქართველი სპორტსმენები კი ეროვნული ჩემპიონატების ფარგლებში გამართულ ყველა თამაშზე საზოგადოებას ძალადობის წინააღმდეგ გაერთიანებისკენ მოუწოდებენ.