იმუნიზაციის საბჭოს გადაწყვეტილებით ხვალიდან, 4 მაისიდან საქართველოში "სინოფარმით" ვაქცინაცია იწყება.
დაავადებათა კონტროლის ეროვნული ცენტრის ინფორმაციით, საქართველოში "სინოფარმით" ვაქცინაციისთვის 18 წელს ზემოთ მოქალაქეების რეგისტრაცია აქტიურად მიმდინარეობს და 27 აპრილიდან სულ დარეგისტრირდა 17 613 მოქალაქე.
მათივე ცნობით, 4 მაისს 09:30 საათზე ნიკოლოზ ყიფშიძის სახელობის ყიფშიძის ცენტრალურ საუნივერსიტეტო კლინიკაში, დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ამირან გამყრელიძე "სინოფარმის“ ვაქცინით აიცრება.
NCDC-ის ცნობით, დღეისთვის ქვეყნის მასშტაბით სამივე ვაქცინის (ასტრაზენეკა, ფაიზერი, სინოფარმი) ადმინისტრირება მიმდინარეობს 91 დაწესებულებაში 137 ბრიგადით.