თბილისის მარცხენა სანაპიროზე, სკუდიერის ქუჩაზე სკვერი და მისი მიმდებარე ტერიტორიები განახლდა. რეაბილიტირებულ სკვერი თბილისის მერმა კახა კალაძემ მოადგილეებთან ერთად დაათვალიერა.
მისი თქმით, სამუშაოების ღირებულებამ 1 700 000 ლარი შეადგინა. რესტავრირდა და მოპირკეთდა საყრდენი კედელი, მოეწყო მწვანე თარგები და სარწყავი ქსელი, დამონტაჟდა დეკორატიული სანათები, გარე განათების ქსელი, უსაფრთხოებისა და ვიდეოსამეთვალყურეო კამერების სისტემა.
„კიდევ ერთი კარგი პროექტი, სკუდიერის სკვერის რეაბილიტაცია განხორციელდა. მანამდე აქ ცუდი მდგომარეობა იყო. ტერიტორიაზე დაახლოებით, 600-მდე სახეობის ხე-მცენარე დაირგო, დამონტაჟდა განათების ქსელები, მოეწყო მიწისქვეშა კომუნიკაციები. ასევე, მხატვრებისთვის განთავსდა სავაჭრო სტენდები, სადაც შეძლებენ საქმიანობის გაგრძელებას“, - განაცხადა კახა კალაძემ.