14 სექტემბრიდან, ვაქცინაციის წამახალისებელი ლატარია იწყება. საკოორდინაციო საბჭოს გადაწყვეტილებით, საქართველოს ლატარიის კომპანია ყოველდღიურად, შემთხვევითი პრინციპით გაათამაშებს ფულად ჯილდოს ვაქცინირებული პირებისთვის. ჯამური საპრიზო ფონდი 2 800 000 ლარია.
ოპერაციული შტაბის უფროსის გიორგი ღიბრაძის განმარტებით, ლატარია გათამაშდება ყოველდღიურად, წლის ბოლომდე. ასევე იქნება, ყოველკვირეული შემაჯამებული გათამაშება. მან აღნიშნა, რომ ლატარიაში მონაწილეობას მიიღებს ყველა აცრილი ადამიანი, მათ შორის - ერთჯერადად.
"100 ლარი და 500 ლარი გათამაშდება ყოველდღიურად, ყოველკვირეულად გათამაშდება 1000, 1500, 5000 და 10 000 ლარი. შემაჯამებელი გათამაშება იქნება წლის ბოლოს და საპრიზო ფონდი იქნება 100 000 ლარი" - თქვა ღიბრაძემ.
აღნიშნულ ლატარიაში მონაწილეობის მიღება შეუძლია ყველა ერთჯერადად აცრილ მოქალაქეს, როგორც 2021 წლის 13 სექტემბრამდე ვაქცინირებულებს, ასევე 2021 წლის 13 სექტემბრის შემდეგ.
საქართველოს ეროვნული ლატარიის იურიდიული დეპარტამენტის ხელმძღვანელმა ქეთევან ხუციშვილმა განაცხადა, რომ გამარჯვებულები გამოვლინდება როგორც ყოველდღიურად, ასევე ყოველკვირეულად, ხოლო საბოლოოდ 31 დეკემბერს შემაჯამებელი გათამაშება გაიმართება. მოგებული პირების ინფორმირებისთვის კი სპეციალური ვებგვერდი stopcov.lotto.ge შეიქმნა.
„ლატარია გაიმართება ყოველდღიურად, ყოველკვირეულად და ასევე იქნება შემაჯამებელი გათამაშება. მინიმალური მოგება იქნება 100 ლარი, ხოლო მაქსიმალური 100 000 ლარი. ყოველდღიურად გათამაშდება დაახლოებით 160 პრიზი. ასევე ყოველკვირეული გათამაშების მოგებული პირები გვეყოლებიან და შემაჯამებელი გათამაშება გაიმართება „საზოგადოებრივი მაუწყებლის“ პირდაპირ ეთერში, სადაც უკვე დოლურაში მოთავსდება ყველა ლატარიის ბილეთი და იქიდან გამოვლინდება ერთი გამარჯვებული პირი. ლატარიაში მონაწილეობა ხდება შემდეგი სახით, როდესაც მომხმარებელს მიენიჭება NCDC-ის მიერ ჯავშნის კოდი, რომელსაც სტატუსი ექნება აცრილი, ის ავტომატურად მონაწილეობას მიიღებს აღნიშნულ ლატარიაში. დღეს დარეგისტრირებული მომხმარებელი, რომელიც აიცრება, მონაწილეობას მიიღებს მომდევნო დღის გათამაშებაში. გათამაშების შედეგები გამოვლინდება დღის 12 საათზე, ხოლო რაც შეეხება ყოველკვირეულ გათამაშებებს, ყოველ ორშაბათ დღეს, ყოველი დღის გათამაშების დასრულებისთანავე იქნება გამოვლენილი.
მოგებულ პირებს ინფორმაციის მიღება შეუძლიათ stopcov.lotto.ge-ზე. განთავსდება ინფორმაცია მოგებულების შესახებ, იქნება მოგებული პირების სახელი და გვარის პირველი ინიციალები, რა აცრით აიცრა მომხმარებელი და რომელ ქალაქში, ასევე ჯავშნის კოდი იქნება მითითებული. ჯანდაცვის სამინისტრო აუცილებლად დაუკავშირდება მოგებულ პირებს და მოხდება მათი ინფორმირება აღნიშნულის შესახებ. ორი გზა არსებობს იმისათვის, რომ მომხმარებელმა გაიგოს მოიგო თუ არა. ერთი უნდა ეწვიოს ვებ-გვერდს - stopcov.lotto.ge და ნახოს მისი ჯავშნის კოდის მონაცემები, ხოლო მეორე გზა არსებობს, თვითონ ჯანდაცვის სამინისტრო დაუკავშირდება და მიაწვდის ინფორმაციას. ლატარიაში მონაწილეობისათვის მომხმარებელი არ გადის არანაირ ავტორიზაციას , არამედ აცრისთანავე მისი ჯავშნის კოდი ავტომატურად ერთვება გათამაშებაში. გათამაშება ხდება საიტზე ავტომატურ რეჟიმში, პროგრამის მიერ ხდება შედეგების გამოვლენა”, - განახადა ქეთევან ხუციშვილმა.
მისივე განცხადებით, 16-დან 18 წლამდე ვაქცინირებული ახალგაზრდების შემთხვევაში ლატარიაში მონაწილეობას მშობლები ან კანონიერი წარმომადგენლები მიიღებენ.
„რაც შეეხება არასრულწლოვნებს, ჯანდაცვის სამინისტროს მიერ ხორციელდება არასრულწლოვან პირთა ვაქცინაციაც, ეს 16 წლიდანაა დაშვებული ჩვენს ქვეყანაში. აღნიშნულ შემთხვევაში ლატარიის კანონის შესაბამისად აკრძალულია არასრულწლოვანების მონაწილეობა და მონაწილეობას მიიღებენ მათი მშობლები ან კანონიერი წარმომადგენლები. ეს ჯავშნის კოდი და ლატარიის ბილეთები გადაეცემათ მათ კანონიერ წარმომადგენლებს“, - განაცხადა ქეთევან ხუციშვილმა.
Stopcov.lotto.ge-ზე ვკითხულობთ, რომ STOPCOVID ლატარიის "აიცერი და მოიგეს" გათამაშების ბილეთებს (ელექტრონული სახით) აცრილი მოქალაქეები სახელმწიფოსგან ვაქცინაციის დროს უფასოდ მიიღებენ. გათამაშებაში მონაწილეობის მისაღებად უნდა იყოთ ერთხელ მაინც ვაქცინირებული. გათამაშებების ბილეთი ვაქცინირებულის NCDC-ის მიერ ელექტრონულად მინიჭებული უნიკალური კოდია. ყოველდღიურ და ყოველკვირეულ გათამაშებებში გამარჯვებულები შემთხვევითობის პრინციპით გამოვლინდებიან (სერტიფიცირებული პროგრამული შემთხვევითი რიხცხვების გენერატორის საშუალებით). შემაჯამებელ გათამაშებაში ყველა აცრილი მოქალაქის ბილეთი მოთავსდება დოლურაში, საიდანაც გათამაშების წამყვანი ამოიღებს ერთერთს და გამოავლენს გამარჯვებულს.
პირველი აცრის გაკეთებისთანავე ბენეფიციარი მონაცემთა ბაზაში ავტომატურად მიიღებს გათამაშების ბილეთს, აცრიდან მეორე დღესვე მიღებული ბილეთი ერთვება "აიცერი და მოიგეს" ყოველდღიურ, ყოველკვირეულ და შემაჯამებელ გათამაშებაში. მომხმარებელი, რომელმაც კოვიდსაწინააღმდეგო ვაქცინაცია "აიცერი და მოიგეს"-ს ლატარიის ამოქმედებამდე, 2021 წლის 13 სექტემბრამდე ჩაიტარა, მონაწილეობას მიიღებს "აიცერი და მოიგეს" ყველა გათამაშებაში.
STOPCOVID ლატარიის ვაქცინირების დროს მიღებული ბილეთი ვალიდურია ყველა გათამაშების განმავლობაში, მანამდე სანამ ბილეთზე არ დაფიქსირდება მოგება. მაგალითად, თუ თქვენ ერთხელ გაიმარჯვეთ ყოველდღიურ გათამაშებაში, თქვენი ბილეთი აღარ მიიღებს მონაწილეობას მომდევნო ყოველდღიურ გათამაშებაში, მაგრამ მიიღებს მონაწილეობას ყოველკვირეულ და შემაჯამებელ გათამაშებებში. იმ შემთხვევაში, თუ მოიგეთ ყოველკვირეულ გათამაშებაში, თქვენი ბილეთი შემდგომში მონაწილეობას მიიღებს შემაჯამებელ გათამაშებაში.
რაც უფრო მალე ჩაიტარებს ადამიანი ვაქცინაციას, მით უფრო ბევრ გათამაშებაში მიიღებს მისი ლატარიის ბილეთი მონაწილეობას და მით უფრო გაიზრდება მისი მოგების შანსი.
1000 ლარის ჩათვლით მოგების განაღდება შესაძლებელია "საქართველოს ეროვნული ლატარიის" სერვის-ცენტრებში, რომლებიც განლაგებულია ყველა მსხვილ სავაჭრო მოლში მთელი საქართველოს მასშტაბით, ხოლო 1 500 - 100 000 ლარის მოგების შემთხვევაში მოგებულს თანხა ჩაერიცხება მის პირად საბანკო ანგარიშზე.
16 დან - 18 წლამდე აცრილი მოქალაქის ლატარიის ბილეთი და ასევე მოგება გადაეცემა მის მშობელს ან მის სხვა კანონიერ წარმომადგენელს. წარმომადგენლობა უნდა იქნეს დადასტურებული შესაბამისი დოკუმენტით.
1000 ლარზე მეტი თანხის მოგების შემთხვევაში, მოგებულ პირს დაუკავდება საქართველოს საგადასახადო კოდექსით გათვალისწინებული გადასახადები. ლატარიის "აიცერი და მოიგეს" ჩატარების მიზანია ვაქცინაციის პროცესის ხელშეწყობა, ვაქცინირებული ადამიანების რაოდენობის, ვაქცინაციის პროცესისადმი ლოიალურობისა და სანდოობის გაზრდა.
