დედაქალაქის მთავარ გამზირზე ამ დროისათვის სრული სიმშვიდეა. პარლამენტის წინ რამდენიმე კარავი რჩება. რუსთაველის გამზირზე თავისუფალია სატრანსპორტო მოძრაობა.
აქცია საკანონმდებლო ორგანოს წინ დღეს, 19:00 საათზეა დაგეგმილი. მანამდე კი, ამ წუთებში, თბილისის საქალაქო სასამართლოში გუშინდელ აქციაზე დაკავებულების პროცესი იწყება.
შინაგან საქმეთა სამინისტრომ 18 ნოემბერს ადმინისტრაციული სამართალდარღვევის ფაქტზე 37 პირი დააკავა.
მათ შორის არიან: მოძრაობა „სირცხვილიას“ ორგანიზატორი გიგა მაქარაშვილი, ზუკა ბერძენიშვილი და ადვოკატი ბექა ბასილაია.
შეგახსენებთ, რომ გუშინ გამართული აქცია სპეცდანიშნულების რაზმმა წყლის ჭავლით დაშალა. სამართალდამცველებმა გაათავისუფლეს პარლამენტის შესასვლელები, რომლებიც აქციის მონაწილეების მიერ პიკეტირებული იყო.
