დღეიდან ქართული სამღვდელოებისთვის დავით გარეჯის კომპლექსის ფარგლებში არსებული ეკლესიები გაიხსნება, - ამის შესახებ საქართველოს პრემიერ-მინისტრმა, გიორგი გახარიამ მთავრობის სხდომაზე 10 ოქტომბერს განაცხადა.
„ჩვენ გვერდს ვერ ავუვლიდით ისეთ მნიშვნელოვან საკითხს, როგორიც არის დავით-გარეჯის სამონასტრო კომპლექსი. ყველას მოგვეხსენება, რომ სამწუხაროდ, საქართველოსა და აზერბაიჯანს შორის არის საზღვრის მონაკვეთები, რომლებიც არ არის დადგენილი, ეს არის ჩვენი პოსტსაბჭოთა მემკვიდრეობა და 25 წელია ეს პრობლემა ვერ მოგვარდა. ბატონმა პრეზიდენტმა ალიევმა ბრძანა, რომ ჩვენ გვაქვს ისტორია და გეოგრაფია, რომელიც გვაკავშირებს. რა თქმა უნდა, მე სრულად შემიძლია ამას დავეთანხმო, რამეთუ მეგობრებს და პარტნიორებს ისტორია და გეოგრაფია კი არ ყოფს, არამედ, აკავშირებს. სწორედ ამ საფუძველზე, ამ ფუნდამენტზე ჩვენ გვქონდა აბსოლუტურად ღია საუბარი მიმდინარე პრობლემებზე და როგორც შედეგი შემიძლია გითხრათ, რომ ხვალიდან ქართული სამღვდელოებისთვის კომპლექსის ფარგლებში არსებული ეკლესიები გაიხსნება და შესაბამისად, ჩვენ ნაბიჯ-ნაბიჯ, ეტაპობრივად ამ მიმართულებით უნდა გვქონდეს სერიოზული პროგრესი“, - განაცხადა გიორგი გახარიამ.
პრემიერ-მინისტრის თქმით აღნიშნულ საკითხზე მასსა და აზერბაიჯანის პრეზიდენტ ილჰამ ალიევს შორის სრულიად ღია საუბარი შედგა.
გირგი გახარიამ პრემიერ-მინისტრის რანგში პირველი ოფიციალური ვიზიტი აზერბაიჯანში გამართა. საქართველოს პრემიერ-მინისტრი აზერბაიჯანის პრეზიდენტს, ილჰამ ალიევს შეხვდა. გახარია ასევე შეხვდა აზერბაიჯანის მილი მეჯლისის თავმჯდომარესა და პრემიერ-მინისტრს.
შორენა სურმანიძე
ავტორი