სასტუმრო „ბილტმორთან“, სადაც ევრონესტის საპარლამენტო ასამბლეის რიგით მერვე ყოველწლიური სესია მიმდინარეობს, მოძრაობა ,„სირცხვილიას“ და ,„შეცვალეს“ წარმომადგენლებმა საპროტესტო აქცია გამართეს.
მოძრაობის წევრები სასტუმროსთან პლაკატებითა და სიმბოლური საარჩევნო ყუთით მივიდნენ. ისინი საარჩევნო სისტემის ცვლილებას ითხოვენ. აქციის მონაწილეების თქმით, მათი მოთხოვნა უცვლელია და ხელისუფლებას დისკომფორტს იქამდე შეუქმნიან, ვიდრე პროპორციულ საარჩევნო სისტემაზე გადასვლის შესახებ მათი მოთხოვნა არ დაკმაყოფილდება.
„ჩვენი მოთხოვნა არ იცვლება. გვინდა ბიძინა ივანიშვილმა შეასრულოს დაპირება. დღეს ძირითადი გზავნილები გვაქვს უცხოელი დიპლომატების მიმართ, რადგან მათი წნეხის გარეშე დემოკრატიული ცვლილება არ მოხდება და ეს ცვლილება პროპორციული სისტემაა“ - განაცხადა "სირცხვილიას" ერთ-ერთმა აქტივისტმა ირაკლი ფავლენიშვილმა.
ადგილზე უსაფრთხოების მიზნით მობილიზებულები არიან სამართალდამცველები.
ევრონესტის საპარლამენტო ასამბლეის რიგით მერვე ყოველწლიური სესია პარლამენტის თავმჯდომარე არჩილ თალაკვაძემ გახსნა.
ღონისძიებაში ასევე მონაწილეობას იღებს საქართველოს პრეზიდენტი სალომე ზურაბიშვილი.
