თავდაცვის ყოფილი მინისტრი, პარტია ,,გამარჯვებული საქართველოს" ლიდერი, ირაკლი ოქრუაშვილი, სოციალურ ქსელში კობა დავითაშვილის გარდაცვალებას ეხმაურება და მასთან გატარებულ წლებს იხსენებს.
,,ალბათ 1993 წელს გავიცანი. თხელი ტყავის "პაპკით" დადიოდა უნივერსიტეტში, მძიმე ნაბიჯით. ყველას მორალს უკითხავდა და იმპერატიული, მტკიცებითი, დამაჯერებელი საუბარი უყვარდა. პირველი 100 დოლარი ერთად ვიშოვეთ, ჯოხთაბერიძეს ფირმა დავურეგისტრირეთ. შემდეგ ამერიკაში წავედით კონფერენციაზე ერთად და კაცი მოგზაურობაში უნდა გაიცნოო, იქაც შევიცანი. ერთი ჯამიდან გვიჭამიაო, ასე ვიყავით. მძიმე საურთიერთობო იყო ჩემსავით. ისე დავუახლოვდით, რომ მეჯვარედ წამიყვანა და პირველი შვილი მომანათლინა. 2004 წელს რაღაც უაზრობა ეწყინა, წასული ამბავია და არ ვიტყვი რა, მაგრამ ჭეშმარიტი კასპელის ხასიათი გამოამჟღავნა და ჭეშმარიტი გორელის ხასიათით ვუპასუხე. მოვიდა სეტყვა და დახვდა ქვაო. 2005-დან ურთიერთობა აღარ მქონია. საჯაროდ გამლანძღა რამდენჯერმე ისეთ რამეზე, რაც ვერ ვაპატიე. 2007-ის ნოემბერში საფრანგეთიდან დავურეკე, როდესაც იმ ნაბიჭვარმა მერაბიშვილმა სამაგალითოდ აცემინა, მოვიკითხე და ეგ იყო ჩვენი ბოლო საუბარი. მას მერე აღარ მისაუბრია, მაინც ვერ ვაპატიეთ ერთმანეთს, როგორც "ჭეშმარიტმა ქართლელებმა" უმნიშვნელო წყენა.
ღმერთმა აცხონოს კობა დავითაშვილი...", - წერს ირაკლი ოქრუაშვილი.
პარლამენტის ყოფილი წევრი კობა დავითაშვილი 49 წლის ასაკში, დღეს გარდაიცვალა.
