დღეს, როდესაც სახელმწიფო ყველა ღონეს ხმარობს, რათა მოქალაქეები ვირუსის გავრცელებისგან დაიცვას, მსგავსი შეკრებები, აბსოლუტურად მიუღებელია, - ამის შესახებ იმერეთში სახელმწიფო რწმუნებულმა ზვიად შალამბერიძემ ჟურნალისტებს ზუგდიდში მომხდარი ფაქტის კომენტირებისას განუცხადა, სადაც ოპოზიციის წარმომადგენლებმა მოქალაქეებს პირბადები დაურიგეს რა დროსაც დისტანციის დაცვა ვერ მოხერხდა.
,,ამდენი ადამიანის შეკრება არის აბსოლუტურად მიუღებელი. მივმართავ ჩვენს მოსახლეობას და იმერეთის მოსახლეობას, ძალიან გთხოვთ, ჩვენ ვუზრუნველყოფთ იმას, რომ ყველა საჭირო ნივთი პირადად სახლში მივაწოდოთ ადამიანებს, განსაკუთრებით იმათ, ვიზეც უკვე ვზრუნავთ და მოხალისეების მეშვეობით 70 წელს გადაცილებულები ვინც არიან და აი, ასეთ იაფფასიან პროვოკაციებს მე ვფიქრობ, არ უნდა წამოეგოს ჩვენი მოსახლეობა. რამდენადაც მე ვიცი მსგავი ჩვენს მხარეშიც იგეგმება და კიდევ ერთხელ მოვუწოდებ იმერეთის მოსახლეობას, რომ მსგავსს შეკრებებს მოერიდონ, ნუ დავაყენებთ საკუთარ თავს და საკუთარ ჯანმრთელობას საფრთხის ქვეშ", - განაცხადა ზვიად შალამბერიძემ.
მისივე თქმით, მომხდარზე სამართალდამცველების რეაგირება ადეკვატური იქნება.
"დარწმუნებული ვარ, სამართალდამცველების რეაქცია ადეკვატური იქნება, იმიტომ რომ დღევანდელ დღეს საგანგებო მდგომარეობა გვაქვს ქვეყანაში და ყველა ადამიანი განურჩევლად მისი პროფესიისა თუ პოლიტიკური მიკუთვნილობისა, უნდა დაემორჩილოს საგანგებო ვითარების წესებს, იმისთვის, რომ ჩვენ მაქსიმალურად შევამციროთ ის რისკი, რაც არის დაკავშირებული კორონავირუსის გავრცელებასთან", - განაცხადა ზვიად შალამბერიძემ.
შეგახსენებთ, დღეს ზუგდიდში ენმ-ის მიერ პირბადეების დარიგებისას, მოქალაქეებს შორის საჭირო დისტანციის დაცვა ვერ მოხერხდა.
შეგახსენებთ, კორონავირუსის გამო, ქვეყანაში საგანგებო რეჟიმი მოქმედებს, რომლის მიხედვითაც,ერთ-ერთი შეზღუდვა,10-ზე მეტი ადამიანის თავშეყრაა.
