"გააჩნია, ვინ რატომ იცრება. მე იმიტომ ავიცერი, რომ კორონამ არ მომკლას. თუ ვიღაც იმიტომ იცრება, რომ უნდა, ევროპაში იმოგზაუროს, გასაგებია, რომ რაღაც ეჭვები გაუჩნდება", - ამის შესახებ დაავადებათა კონტროლის ეროვნული ცენტრის დირექტორის მოადგილემ, პაატა იმნაძემ "სინოფარმის" ვაქცინაზე საუბრისას განაცხადა.
"მოდით, ისიც გავიხსენოთ, რომ ევროპის ტურისტული ინდუსტრიის 10-15% ჩინელი ტურისტებით არის დაკავებული. ისიც გავიხსენოთ, რომ ევროკავშირის წევრი ქვეყანაა უნგრეთი, მგონი, მილიონამდე არის სინოფარმით აცრილი. არა მგონია, უნგრეთის მოქალაქეებს დაუკეტოს ევროკავშირმა ევროპაში გადაადგილება", - განაცხადა პაატა იმნაძემ "ტვ პირველის" ეთერში.
პაატა იმნაძე იმედოვნებს, რომ "სინოფარმთან" დაკავშირებით ჯანდაცვის მსოფლიო ორგანიზაციის დასკვნა დადებითი იქნება.
WHO-ს ვაქცინისთვის ავტორიზაცია ჯერჯერობით არ მიუცია.
შეგახსენებთ, დღეიდან, 4 მაისიდან საქართველოში „სინოფარმით“ ვაქცინაცია დაიწყო.