საქართველოს პატრიარქმა, ილია II-მ SOCAR Energy Georgia- ს გენერალურ დირექტორს, მაჰირ მამედოვს საპატრიარქოში უმასპინძლა.
საპატრიარქოს ცნობით, შეხვედრაზე თანამშრომლობის საკითხები განიხილეს. ილია მეორემ მადლობა გადაუხადა SOCAR Energy Georgia- ს 5 წლის განმავლობაში საპატრიარქოს მხარდაჭერისთვის.
პროტოპრესვიტერმა გიორგი ზვიადაძემ განაცხადა, რომ შეხვედრაზე საუბარი შეეხო ორ ქვეყანასა და ხალხებს შორის ურთიერთობებს. მან აღნიშნა, რომ ეს ურთიერთობები ემყარება ურთიერთპატივისცემას:
"ხუთი წლის წინ, აზერბაიჯანის სახელმწიფო ნავთობკომპანიამ (SOCAR) პრეზიდენტ ილჰამ ალიევის მხარდაჭერით დაიწყო საქართველოში ეკლესიების მიერ მოხმარებული ბუნებრივი აირის ანაზღაურების პროექტი. პროგრამა მოიცავს დაახლოებით 650 ეკლესიას და მონასტერს 35 ეპარქიაში" - აღნიშნა ზვიადაძემ.
შეხვედრაზე მამედოვმა მადლობა გადაუხადა საქართველოს პატრიარქს აზერბაიჯანელ და ქართველ ხალხებსა და სახელმწიფოებს შორის მეგობრული და მჭიდრო ურთიერთობების განმტკიცებისთვის.
ცნობისთვის, 2014 წლის ნოემბერში საქართველოს საპატრიარქოსა და SOCAR Energy Georgia- ს შორის თანამშრომლობის მემორანდუმი გაფორმდა.
