"კარფურს" კომპანიები უჩივიან. ამის შესახებ დისტრიბუტორთა ასოციაციაცია იუწყება. როგორც ირკვევა, "კარფური" ქართველ მწარმოებელ და სადისტრიბუციო კომპანიებს სამართლებრივი საფუძვლის გარეშე სოლიდურ თანხებს აჭრის და ასანაზღაურებელ თანხებს უკან არ უბრუნებს. ერთ-ერთი კომპანია, რომელიც სასამართლოში „კარფურის“ წინააღმდეგ დავას იწყებს, შპს „ალასკაა“, რომელსაც თანაშრომლობის ვადის ამოწურვის მიუხედავად, „კარფურმა“ ახალი მარკეტის გახსნის დროს ქსელში დაშვების თანხა ავტომატურად დააკისრა.
„87 000-ის პროდუქცია გვაქვს შეტანილი. აქედან ჩარიცხული აქვთ მხოლოდ 40 000. 47 000 ფაქტობრივად ჰაერშია, იქიდან გამომდინარე, რომ როგორც ჩანს, „კარფურმა“ 2016 წლისაც ჩამოგვაჭრა წინასწარ, მაგრამ 2016 წელს ჩვენ მათთან აღარ გვითანამშრომლია“, - ამბობს შპს „ალასკას“ დირექტორი, ილია მოსულიშვილი.
"კარფურს უჩივის "სანდომიც". მისი მხრიდან დავის დაწყების მიზეზი კი, გაურკვეველი მარკეტინგული გადასახადი და ორენოვანი ხელშეკრულებაა, რომელთა მუხლებიც განსხვავებული შინაარსისაა.
„ერთ-ერთ პუნქტში ინგლისურ ენაზე ჩაამატეს, რომ მარკეტინგული ბიუჯეტი, რომელიც წინა წელს 6.5%-ით დაგვიდეს, მინიმუმ უნდა ყოფილიყო 78 000 ლარი. ქართულ ვარიანტში ეს პუნქტი საერთოდ გამოტოვებულია. იანვარში აღმოჩნდა, რომ ეს მარკეტინგული ბიუჯეტი, რომელიც ვერ გავხარჯეთ, უნდა გადაგვეხადა კარფურისთვის - ზედმეტი 15 000 ლარი“, - აცხადებს შპს „სანდომის“ დამფუძნებელი, მერაბ ვასაძე.
საქართველოს კონკურენციის ეროვნულმა სააგენტომ საკანონმდებლო ორგანოს საცალო ბაზრის დისტრიბუტორების და მწარმოებლების ინტერესების დამცავი საკანონმდებლო ნორმის შემოღების რეკომენდაციით უკვე მიმართა.
ბელა გელაშვილი
ავტორი