მთავრობამ „100 საინვესტიციო შეთავაზება ბიზნესს“ პროგრამის ფარგლებში გამოცხადებულ მორიგ აუქციონზე 8 005 800 ლარად შეფასებული 38 სასოფლო-სამეურნეო დანიშნულების მიწა გამოიტანა. აუქციონი 18 მაისს დასრულდა და გასაყიდად გამოტანილი 38 სასოფლო-სამეურნეო დანიშნულების მიწიდან მხოლოდ 4 გაიყიდა, აქედან 2 ნაკვეთი მცხეთაში მდებარეობს.
აუქციონის წესში განმარტებული იყო კანონმდებლობის ის მუხლი, რომლის მიხედვითაც სასოფლო-სამეურნეო დანიშნულების მიწის ნაკვეთის შემძენი არ უნდა ყოფილიყო: უცხოელი (ფიზიკური პირი, რომელიც არ არის საქართველოს მოქალაქე, ასევე, საქართველოში სტატუსის მქონე მოქალაქეობის არმქონე პირი); იურიდიული პირი, რომლის დომინანტი პარტნიორია უცხოელი ან/და საზღვარგარეთ რეგისტრირებული იურიდიული პირი, ან რომლის დომინანტი პარტნიორი ვერ დგინდება.
1. 1 870 000 ლარად გაიყიდა გამოტანილი 38 სასოფლო-სამეურნეო მიწიდან, ყველაზე ძვირად ღირებული ქონება მცხეთის მუნიციპალიტეტში, სოფელ მუხრანში მდებარე 310268 კვ.მ. სასოფლო-სამეურნეო (სახნავი) დანიშნულების მიწის ნაკვეთი
2. 335 000 ლარად გაიყიდა მცხეთის მუნიციპალიტეტში, სოფელ მუხრანში მდებარე 66839 კვ.მ. სასოფლო-სამეურნეო (სახნავი) დანიშნულების მიწის ნაკვეთი.
3. 106 000 ლარად გაიყიდა დედოფლისწყაროს მუნიციპალიტეტში სოფელ საბათლოში მდებარე 123907 კვ.მ. სასოფლო-სამეურნეო (სახნავი) დანიშნულების მიწის ნაკვეთი.
4. 31000 ლარად გაიყიდა მარტვილის მუნიციპალიტეტში, სოფელ აბედათში მდებარე 28023 კვ.მ. სასოფლო-სამეურნეო (სახნავი) დანიშნულების მიწის ნაკვეთი.
ბელა გელაშვილი
ავტორი