სხვადასხვა ქვეყნის მიერ COVID-19-ს გამო გაჩერებული ეკონომიკის ეტაპობრივად გახსნამ ნავთობპროდუქტებზე მოთხოვნის ზრდა განაპირობა. ნავთობპროდუქტების იმპორტიორთა კავშირი ,,რია ნოვოსტზე" დაყრდნობით ავრცელებს ინფორმაციას, რომ მიმდინარე პერიოდში გლობალურ ბაზრებზე მოთხოვნამ, წინა თვესთან შედარებით, 20%-ით მოიმატა.
ნავთობპროდუქტების იმპორტიორთა კავშირის ხელმძღვანელის, ვანო მთვრალაშვილის თქმით, გაიზარდა საწვავის საერთაშორისო ფასიც და ბარელზე შეადგინა 36 დოლარი, რაც ბოლო 1 თვის ყველაზე მაღალი მაჩვენებელია.
,,ბოლო 2 კვირაა, ნავთობპროდუქტებზე მოთხოვნა მატულობს. გლობალურ ბაზრებზე ამ მხრივ დიდი გავლენა მოახდინა ,,ოპეკი+" ქვეყნებს შორის შეთანხმების დაწყებამ მოპოვების კვოტებთან დაკავშირებით. გარდა ამისა, ეტაპობრივად მსოფლიოს ბევრი ბევრი ქვეყანა ხსნის COVID-19-თან დაკავშირებულ შეზღუდვებს. ამის ნათელი მაგალითა საქართველოც, ცხოვრება თანდათან ჩვეულ ტემპს უბრუნდება. რამდენიმე დღეა, კერძო სატრანსპორტო საშუალებების გადაადგილებაზეც მოიხსნა შეზღუდვა და ნავთობპროდუქტების ბაზარზე შედეგიც სახეზეა", - აცხადებს მთვრალაშვილი.
ნავთობპროდუქტების იმპორტიორთა კავშირის ინფორმაციით, ნავთობპროდუქტებზე მოთხოვნის მოთხოვნის ზრდის შესახებ ოფიციალურად განაცხადა რუსეთის ენერგეტიკის სამინისტრომაც და ასევე აღინიშნა, რომ ნავთობის მსოფლიო კვოტირების ზრდაზე დადებითად იმოქმედა ,,ოპეკი +"-ის ახალი შეთანხმების ძალაში შესვლამ.
მარიამი ჩიტაია
ავტორი