"საერთაშორისო გამჭვირვალობა-საქართველო" საზოგადოებრივი აზრის გამოკითხვის იმ ნაწილს ასაჯაროებს, რომელიც არჩევნებსა და პოლიტიკაში მონაწილეობას ეხება.
კვლევის თანახმად: მოსახლეობის ორ მესამედზე მეტი მხარს უჭერს ქვეყანაში სრულად პროპორციული საარჩევნო სისტემის შემოღებას
2020 წლის საპარლამენტო არჩევნებისთვის სრულად პროპორციულ სისტემაზე გადასვლაზე ნოემბერში პარლამენტის მიერ ჩაგდებული გადაწყვეტილების შესახებ ინფორმირებული რესპოდენტების 64%-დან:
უმრავლესობას არ სჯერა, რომ ეს ე.წ. მაჟორიტარების ამბოხის გამო მოხდა.
31% ფიქრობს, რომ მიზეზი ბიძინა ივანიშვილის პირადი გადაწყვეტილება იყო.
25% კი მმართველი პარტიის პოლიტიკური გადაწყვეტილებას მიაწერს.
გამოკითხვის თანახმად, შარშანდელის მსგავსად, წელსაც ძალიან მაღალია იმ რესპოდენტების რიცხვი - 79% - ვინც პოლიტიკაში ახალი პოლიტიკური ძალის გამოჩენის საჭიროებას ხედავს.
შეგახსენებთ, რომ კვლევა „საერთაშორისო გამჭვირვალობა - საქართველოს“ დაკვეთით „კავკასიის კვლევითი რესურსების ცენტრმა“ (CRRC) 2020 წლის 27 თებერვლიდან 18 მარტამდე პერიოდში ჩაატარა და მთელი ქვეყნის მასშტაბით 1,763 ადამიანი გამოკითხა. კვლევის საშუალო ცდომილება 2.2 პროცენტული პუნქტია.
