"თუ საპარლამენტო ცხოვრებაში მონაწილეობაზე უარს ამბობს კონკრეტული პარტია, ლოგიკურია, რომ მას შესაბამისი დაფინანსება არ გადაეცეს,"- ამის შესახებ, "ქართული ოცნების" ერთ-ერთმა ლიდერმა, მამუკა მდინარაძემ ჟურნალისტებთან საუბრის დროს განაცხადა.
მდინარაძის თქმით, თუ პარტიები მოვალეობის შეუსრულებლობაში ფულს მიიღებენ, ამ ლოგიკით დაფინანსებას არასაპარლამენტო პარტიებიც იმსახურებენ.
"მხოლოდ მიღებული ხმების რაოდენობა თუ არის კრიტერიუმი, მიიღებს თუ არა რომელიმე პარტია დაფინანსებას, რატომ ვერ იღებენ ამ დაფინანსებას არასაპარლამენტო პარტიები, მათ ხმები არ მიუღიათ? რაღაც რაოდენობა ხომ ყველამ მიიღო. ანუ, დაფინანსება, მოქმედი კანონმდებლობით, პირდაპირაა მიბმული იმასთან, კონკრეტულმა პარტიამ გადალახა თუ არა ბარიერი და გახდა თუ არა ის საპარლამენტო პარტია. თუ საპარლამენტო ცხოვრებაში მონაწილეობაზე უარს ამბობს კონკრეტული პარტია, ლოგიკურია, რომ მას შესაბამისი დაფინანსება არ გადაეცეს,"- განაცხადა მამუკა მდინარაძემ.
ცნობისთვის, რამდენიმე დღის წინ "ქართული ოცნების" ოფისში გამართულ ბრიფინგზე, ირაკლი კობახიძემ განაცხადა, რომ პარტიები, რომლებიც პარლამენტში არ შევლენ დაფინანსებითა და უფასო პოლიტიკური რეკლამით ვერ ისარგებლებენ.
სალომე კაპანაძე
ავტორი