ოპოზიციური პარტიები „ერთიანი ნაციონალური მოძრაობის“ თავმჯდომარის, ნიკა მელიას საქმესთან დაკავშირებით ერთობლივ განცხადებას ავრცელებენ, რომელსაც უცვლელად გთავაზობთ:
,,ივანიშვილის პროკურატურამ პარლამენტს, რომელიც ქართველი ხალხის ნებას არ გამოხატავს, ნიკა მელიას დასაპატიმრებლად თანხმობისთვის მიმართა.
ჩვენ საქართველოს დემოკრატიული ოპოზიციური პარტიები მივიჩნევთ რომ ეს და ნიკა მელიასთან დაკავშირებით მიღებული სხვა გადაწყვეტილებები, წარმოადგენს ხელისუფლების მხრიდან პოლიტიკური ოპონენტების წინააღმდეგ დანაშაულებრივ ბრძოლას, რომელსაც კავშირი არ აქვს მართლმსაჯულებასა და სამართლიანობასთან.
ცინიკური და აბსურდულია გირაოს გადახდის მოთხოვნაც იმ პოლიტიკოსისთვის, რომელსაც ქვეყანა არ დაუტოვებია უშუალოდ დაკავების საფრთხის წინაც კი და ისედაც ითხოვს მისი საპარლამენტო მანდატის გაუქმებას.
მელიას საქმე ნათელი დასტურია თუ რა მეთოდებით იბრძვის ,,ქართული ოცნება" ძალაუფლების შესანარჩუნებლად, თუ რამხელა საფრთხეს წარმოადგენს ის საქართველოს დემოკრატიული მომავლისთვის.
ნიკა მელიას დაპატიმრება ან დაპატიმრების მომზადების მედია პროცესის შექმნა, ისედაც რადიკალიზებული პოლიტიკური გარემოს მეტად პოლარიზების შესაძლებლობას აჩენს, რაც მხოლოდ და მხოლოდ პროვოკაციად შეიძლება შეფასდეს.
ხელისუფლებამ უნდა შეწყვიტოს ოპონენტების სისხლის სამართლებრივი წესით დევნა, შეასრულოს 8 მარტის შეთანხმება და გაათავისუფლოს პოლიტპატიმარი გიორგი რურუა, ამასთან მიუჯდეს მოლაპარაკებების მაგიდას, სადაც შეთანხმება მიიღწევა ახალი არჩევნებისა და ახალი საარჩევნო წესების შესახებ", - აღნიშნულია განცხადებაში.
დოკუმენტს ხელს აწერენ: ,,ერთიანი ნაციონალური მოძრაობა", ,,ევროპული საქართველო", ,,საქართველოს ლეიბორისტული პარტია", ,,ლელო", ,,ახალი საქართველო", ,,საქართველოს რესპუბლიკური პარტია", ,,ეროვნულ-დემოკრატიული პარტია", ,,ევროპელი დემოკრატები", ,,საქართველოს პარლამენტართა საზოგადოება", ,,ქრისტიან-კონსერვატიული პარტია", ,,მოძრაობა სახელმწიფო ხალხისთვის", ,,გირჩი -მეტი თავისუფლებისთვის", ,,მოძრაობა სამართლიანობისთვის", ,,ქრისტიან-დემოკრატიული მოძრაობა", ,,ახალი ქრისტიან-დემოკრატები", ,,გამარჯვებული საქართველო", ,,ერთიანი საქართველო-დემოკრატიული მოძრაობა", ,,კანონი და სამართალი", ,,სამოქალაქო ალიანსი თავისუფლებისთვის", ,,თავისუფალი დემოკრატები", ,,სტრატეგია აღმაშენებელი", ,,ემსახურე საქართველოს",,ერთიანი საქართველო - დემოკრატიული მოძრაობა", ,,გამარჯვებული საქართველო", ელენე ხოშტარია და ირაკლი ღლონტი.
