პარლამენტმა ცესკო-ს თავმჯდომარე და წევრები ვერც 90-ხმიანი კვორუმით აირჩია. 3/5-იანი კვორუმით ჩატარებულ, რიგით მესამე კენჭისყრაზეც ჩავარდა.
ამასთან, კენჭისყრის შედეგებიდან გამომდინარე, ცნობილია, ვის აირჩევს მმართველი გუნდი სრული შემადგენლობის უმრავლესობით.
ესენი არიან: - გიორგი კალანდარიშვილი, გია ცაცაშვილი და მაია ზარიძე.
დღევანდელი კენჭისყრის შედგები კი ასეთია:
ცენტრალური საარჩევნო კომისიის თავმჯდომარეობის პოსტზე წარდგენილი კანდიდატურები:
გიორგი კალანდარიშვილი 81- მომხრე, 7 - წინააღმდეგი;
გიორგი სანტურიანი 3 - მომხრე, 8 - წინააღმდეგი;
ცენტრალური საარჩევნო კომისიის წევრობის პირველ ვაკანტურ პოსტზე ასარჩევი კანდიდატები:
გია ცაცაშვილი 77 - მომხრე, 7 - წინააღმდეგი;
ლელა ტარიული 17 - მომხრე, არცერთი წინააღმდეგი;
ცენტრალური საარჩევნო კომისიის წევრიბის მეორე ვაკანტურ პოსტზე ასარჩევი კანდიდატები:
თამარ სართანია 14 - მომხრე, 5 - წინააღმდეგი;
მაია ზარიძე 78 - მომხრე, 5 - წინააღმდეგი;
მომდევნო კვირას აღნიშნულ კანდიდატურებს სრული შემადგენლობის უმრავლესობით ეყრება კენჭი.
76-ხმიანი კვორუმით არჩევის გამო, მათი უფლებამოსილების ვადა 6 თვე იქნება.
ცნობისთვის, საარჩევნო კანონმდებლობაში გახორციელებული ცვლილებებით, ცესკო-ს თავმჯდომარისა და წევრების არჩევას 100 ხმა სჭირდება. იმ შემთხვევაში, თუ 2/3 -ით არჩევა ვერ მოხერხდა, კენჭისყრა კვლავ 2/3-იანი კვორუმით უნდა ჩატარდეს და არჩევა თუ მაინც ვერ მოხერხდა, ამ შემთხვევაში, საჭირო იქნება 3/5 ანუ 90 ხმა. პარლამენტმა ცესკოს თავმჯდომარე და წევრები თუ ამ კვორუმითაც ვერ აირჩია, მაშინ არჩევისთვის 76 ხმა საკმარისი იქნება. ახალი კანონის მიხედვით, თუ ცესკო-ს თავმჯდომარე არჩეულია პარლამენტის სრული შემადგენლობის არანაკლებ ორი მესამედის უმრავლესობით, მისი უფლებამოსილების ვადაა 5 წელი, ხოლო სხვა შემთხვევაში − 6 თვე.
