ჩვენი პოლიტიკური პარტნიორები აფასებენ საქართველოში დემოკრატიზაციის კუთხით არსებულ პროგრესს,-ამის შესახებ განცხადება დავოსში მყოფმა საქართველოს პრემიერ-მინისტრმა გააკეთა. გიორგი გახარიას თქმით დავოსის ფორმატი არის საშუალება სადაც პოლიტიკურ ლიდერებს აქვთ საშუალება ისეუბრონ ერთმანეთთან, ბიზნესლიდერებთან და განიხილონ გლობალური აქტუალური საკითები.
მთავრობის მეთაურის შეფასებით, საქართველო უნდა გახდეს და გახდება ევროკავშირის სრულფასოვანი წევრი, თუმცა ჩვენ ბევრი საშინაო დავალება გვაქვს შესასრულებელი. ეს იყო ის ძირითადი თემები, რაზეც ვიმსჯელეთ.
როგორც პრემიერმა აღნიშნა, 2020 წელს დაგეგმილ აღმოსავლეთ პარტნიორობის სამიტზე საქართველო წარადგენს კონკრეტულ ხედვას, როგორ ხედავს ევროკავშირში ინტეგრირების შემდგომ პროცესს და ეს იყო ძირითადი თემები, რაზეც საუბარი შედგა ესტონეთის, ლიეტუვას, ლატვიის, ხორვატიის პრეზიდენტებსა თუ პრემიერებთან.
“ჩვენი პოლიტიკური პარტნიორები აფასებენ საქართველოში დემოკრატიზაციის კუთხით არსებულ პროგრესს, ყურადღებით აკვირდებიან საარჩევნო პროცესს, ამბობენ, რომ არჩევნები უნდა იყოს სამაგალითო და ეს პასუხისმგებლობა ჩვენთვის აბსოლუტურად გასაგებია. გარდა ამისა, ჩვენ ბევრი ვისაუბრეთ უსაფრთხოების კონტექსტზე, განსაკუთრებით შავი ზღვის კონტექსტში და ეს ის ფუნქციაა, რომლითაც დღეს საქართველოს შეუძლია, მნიშვნელოვანი წვლილი შეიტანოს ევროპული უსაფრთხოების კონცეფციისა და არქიტექტურის შექმნაში. ამას ჩვენი პარტნიორები აფასებენ, ასევე აფასებენ საქართველოს ინტეგრირების ხარისხს ნატოსთან და აცხადებენ, რომ 2019 წლის შედეგები ნატო-საქართველოს თანამშრომლობაში მართლაც შთამბეჭდავია”, - განაცხადა პრემიერ-მინისტრმა.
