ეუთო-ს თავმჯდომარე, შვედეთის საგარეო საქმეთა მინისტრი ანა ლინდე საქართველოს 16 თებერვალს ეწვევა. ამის შესახებ ინფორმაცია ეუთო-ს ვებგვერდზე გამოქვეყნდა.
საქართველოში ვიზიტის ფარგლებში, ანა ლინდე მაღალი დონის შეხვედრებს გამართავს. ეუთოს თავმჯდომარე საქართველოს პრეზიდენტს სალომე ზურაბიშვილს, პრემიერ-მინისტრ გიორგი გახარიას, საგარეო საქმეთა მინისტრ დავით ზალკალიანს და შერიგებისა და სამოქალაქო თანასწორობის საკითხებში სახელმწიფო მინისტრს თეა ახვლედიანს შეხვდება.
საქართველოში ვიზიტის შესახებ ანა ლინდე სოციალურ ქსელშიც წერს.
„მივემგზავრები საქართველოში ეუთო-ს თავმჯდომარის რანგში. დავადასტურებთ ეუთო-ს მტკიცე მხარდაჭერას საქართველოსადმი კონფლიქტების გადაწყვეტის და ინსტიტუტების გაძლიერებაში - ორივე სფეროში, სადაც ქალებს და სამოქალაქო საზოგადოებას გადამწყვეტი როლის შესრულება შეუძლიათ“, – წერს ლინდე ,,ტვიტერში".
