გიორგი შაქარაშვილის მკვლელობის საქმეზე ბრალდებულმა ვახო ჩიქოვანმა სასამართლოს ჩვენება მისცა, სადაც ის ამბობს, რომ გურამ ამირხანაშვილმა შაქარაშვილის მოძებნაზე უარი განაცხადა და მოითხოვა, "ტოიოტას" მგზავრებს თბილისში წაეყვანათ.
ბრალდებული ირწმუნება, რომ ძებნის დროულად დაწყების შემთხვევაში შაქარაშვილი დღეს ცოცხალი იქნებოდა.
"მას რომ ჩვენი შეთავაზება მიეღო და მეგობარი მოეძებნა, დღეს 99% ის ბავშვი ცოცხალი იქნებოდა. ემოციური იყო ძალიან ამირხანაშვილი, დაიწყო ეგრევე, მე დამნაშავე არ ვარ, არანაირ კონფლიქტში მონაწილეობა არ მიმიღიაო. ვუთხარით, ვისთან ერთად იყავითო, მეგობართან ერთადო. ვასილ მახარაძემ უთხრა, დაერეკა მეგობართან, მან თქვა, რომ მეგობარს ტელეფონი არ ჰქონდა. შევთავაზეთ, რომ მოეძებნა მეგობარი და ჩვენ წავიყვანდით, ამაზეც უარი განაცხადა. წამო, წამო წავიდეთო. თავისი ნებით ჩაგვიჯდა მანქანაში" - ამბობს ჩიქოვანი ჩვენებაში. ის სასამართლოში 4 საათი იკითხებოდა.
ცნობისთვის, გიორგი შაქარაშვილის გარდაცვალების საქმეზე ბრალდებულების მხარემ, გუშინ, სასამართლო სხდომაზე ვიდეო-ექსპერტიზის დასკვნა წარმოადგინა.
შეგახსენებთ, 19 ივნისს, დაახლოებით 11:00 საათზე გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი უწყვეტი საძიებო სამუშაოების შედეგად მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
შინაგან საქმეთა სამინისტრომ ფეხბურთელ გიორგი შაქარაშვილის საქმეზე 26 ივნისს 17 ადამიანი დააკავა.
28 ივნისს გიორგი შაქარაშვილის საქმეზე ბრალდებულ 17 პირს აღკვეთის სახით პატიმრობა შეეფარდა.
10 ივლისს პროკურატურამ გაავრცელა ინფორმაცია, რომლის თანახმადაც, გიორგი შაქარაშვილის სიკვდილის მიზეზია ასფიქსია წყალში დახრჩობით.ამასთან, ექსპერტიზის დასკვნით გაირკვა, რომ მას გარდაცვალებამდე მკვრივი-ბლაგვი საგნით მიყენებული დაზიანებები აქვს.
გენპროკურატურამ შაქარაშვილის საქმეზე 11 ბრალდებულის საქმე ცალკე წარმოებად გამოყო. გიორგი შაქარაშვილის საქმეზე ხუთ დაკავებულს ბრალი დაუმძიმდა.
საქართველოს გენერალურმა პროკურატურამ გიორგი შაქარაშვილის დამამძიმებელ გარემოებებში განზრახ მკვლელობის ბრალდებით სისხლის სამართლებრივი დევნა ხუთი პირის მიმართ დაიწყო.