Virgin Galactic-ის აქციების ფასი 4%-ით დაეცა მას შემდეგ, რაც კომპანიის დამფუძნებელმა, რიჩარდ ბრენსონმა საკუთარი წილის ნაწილი გაყიდა. ამის შესახებ საინფორმაციო სააგენტო Bloomberg წერს.
გამოცემის ცნობით, კომპანიის 15,5 მილიონი აქცია (კაპიტალის დაახლოებით 6%) 300 მილიონ დოლარად გაიყიდა.
გავრცელებული ინფორმაციით, აქციების გაყიდვის შემდეგ ბრენსონს კომპანიის 11,9%-იანი წილი დარჩა და იგი კვლავ უმსხვილესი აქციონერია.
2021 წლის აგვისტოში ბრენსონმა 322 მილიონი დოლარის ღირებულების აქციები გაყიდა.
Forbes-ის ცნობით, მეწარმის ქონება ახლა 4,1 მილიარდ დოლარად არის შეფასებული.
შეგახსენებთ, კომპანია კოსმოსური ფრენებისთვის არის განკუთვნილი. აშშ-ის ფედერალურმა საავიაციო ადმინისტრაციამ (FAA) დაასრულა გამოძიება Virgin Galactic's სარაკეტო საფრენი აპარატის Unity სუბორბიტალური ფრენის შესახებ და კოსმოსური ფრენების გაგრძელების უფლება მისცა.
ბრიტანელმა მილიარდერმა და Virgin Galactic-ის დამფუძნებელმა, რიჩარდ ბრენსონმა, 11 ივლისს, პირველი კოსმოსური ფრენა განახორციელა.
