ევროპაში გაზის ღირებულება სავაჭრო ბირჟის გახსნის მომენტში 5,3%-ით გაიზარდა და ოქტომბრის დასაწყისიდან პირველად, ათას კუბურ მეტრზე 1 400 აშშ დოლარს გადააჭარბა. ამას მოწმობს ლონდონის საფონდო ბირჟის ICE-ის მონაცემები.
ამ დროისათვის, გაზის იანვრის ფიუჩერსების ფასმა ნიდერლანდების TTF-ის ჰაბში, ბირჟის გახსნისთვის, ათას კუბურ მეტრზე 1 405 აშშ დოლარი შეადგინა, ხოლო მოგვიანებით 1 425,5 დოლარამდე გაიზარდა.
ევროპაში გაზის ფასი ბოლო თვეებში მკვეთრად გაიზარდა. ჯერ კიდევ აგვისტოს დასაწყისში, ნიდერლანდების TTF-ის ჰაბში ათასი კუბური მეტრი გაზი 515 აშშ დოლარად ივაჭრებოდა, სექტემბრის ბოლოსთვის ეს მაჩვენებელი გაორმაგდა.
Financial Times-ის ცნობით, გაზზე ფასის ზრდის ერთ-ერთი მიზეზი არის ის გარემოება, რომ "გაზპრომმა" უარი თქვა უკრაინის გავლით დამატებითი მოცულობების მიწოდებაზე, რომელიც ევროპაში ექსპორტის გაზრდას ისახავდა მიზნად.
