სატელევიზიო მაუწყებლობიდან მიღებული შემოსავლების ოდენობის მიხედვით, 2019 წელს ყველაზე დიდი წილი „ტელეიმედს“ ეკავა - 28%, მას მოსდევდა „რუსთავი 2“ - 24%, „ფორმულა“ - 17%, საზოგადოებრივი მაუწყებელი - 7%, „ტელეკომპანია პირველი“ - 4%, „სილქნეტი“ და „მთავარი არხი“ - 3-3%. სხვა მაუწყებლების შემოსავლების ჯამურმა წილმა 13% შეადგინა.
ამის შესახებ აღნიშნულია კომუნიკაციების კომისიის 2019 წლის ანგარიშში.
დოკუმენტის მიხედვით, სატელევიზიო სარეკლამო შემოსავლების ოდენობის მიხედვით, 2019 წელს ყველაზე დიდი წილი „ტელეიმედს“ ეკავა - 39%. მას მოსდევდა „რუსთავი 2“ – 32%, „ტელეკომპანია პირველი“ - 6%, „სილქნეტი“ -4% და „მთავარი არხი“ - 4%, სხვა მაუწყებლების სარეკლამო შემოსავლების ჯამურმა წილმა 15% შეადგინა.
კომუნიკაციების კომისიის ცნობით, სატელევიზიო მაუწყებლების მიერ მიღებული ჯამური შემოსავლის ძირითად წყაროს - მთლიანი შემოსავლის 63.4%-ს - რეკლამა და სპონსორობა შეადგენდა.
სატელევიზიო მაუწყებლების მიერ მიღებული ჯამური სარეკლამო შემოსავლის ძირითად წყაროს რეკლამა, პროდუქტის განთავსება და სპონსორობა შეადგენდა.
რაც შეეხება რადიოს, მისი მაუწყებლების სარეკლამო შემოსავლების ძირითად წილს - 99%-ს რეკლამა და სპონსორობა წარმოადგენა, ძალიან მცირე წილი კი, პროდუქტის განთავსებასა და განცხადებებს მოიცავდა.
რადიო მაუწყებლობიდან მიღებული სარეკლამო შემოსავლების ოდენობის მიხედვით, 2019 წელს ყველაზე დიდი წილი 56% „რადიო ჰოლდინგ ფორტუნას“ ეკავა, შემდეგ „რადიო იმედს“ - 11%, „ჯეო მედიას“ და „ქართულ რადიოს“ - 5-5%. სხვა რადიო მაუწყებლების სარეკლამო შემოსავლების ჯამურმა წილმა 23% შეადგინა.
ბელა გელაშვილი
ავტორი